एन्सेलोटीको बार्षिक तलब १ अर्ब ६४ करोड रुपैयाँ !

काठमाडौं। फुटबल इतिहासको सबैभन्दा सफल टिम ब्राजिल अहिले नयाँ युगतर्फ उन्मुख छ। पाँचपटकको विश्वकप विजेता यो टिम २००२ यता पुनः विश्व फुटबलको शिखर चुम्न सकेको छैन।

पछिल्ला दुई विश्वकपमा त ब्राजिलको यात्रा क्वार्टरफाइनलमै टुंगिएको थियो। यही बाधा तोड्नका लागि ब्राजिलले यतिबेला फुटबलका सबैभन्दा सफल प्रशिक्षकमध्ये एक, इटालियन कार्लो एन्सेलोटीलाई टिम जिम्मा दिएको छ।

एन्सेलोटीले सन् २०२५ को मे महिनामा ब्राजिलको मुख्य प्रशिक्षकको रूपमा काम थालनी गरेका हुन्। लामो समयसम्म क्लब फुटबलमा प्रशिक्षण गरेका उनले एसी मिलान र रियल मड्रिडसँग गरी पाँचवटा युरोपियन च्याम्पियन्स लिग जितेका छन्। जुन कीर्तिमान कुनै पनि प्रशिक्षकले अहिलेसम्म दोहोर्‍याउन सकेका छैनन्।

उनको आगमनसँगै ब्राजिल टिममा सकारात्मक परिवर्तनको संकेत देखिन थालेको छ। हालै सम्पन्न खेलमा ब्राजिलले दक्षिण कोरियालाई ५-० ले हराएर आत्मविश्वासिलो प्रदर्शन गरेको छ। एन्सेलोटीको नेतृत्वमा ब्राजिलले हालसम्म ४ खेल खेलेको छ, जसमा २ जित, १ बराबरी र १ हार रहेको छ।

यति धेरै उपलब्धि बोकेका प्रशिक्षकलाई ब्राजिल फुटबल महासंघले दिएको तलब पनि असाधारण छ। ब्राजिलियन सञ्चारमाध्यम ग्लोबोका अनुसार एन्सेलोटीको वार्षिक तलब १० मिलियन युरो छ, जसमा बोनस छुट्टै रहेको बताइएको छ।

यो रकम नेपाली रुपैयाँमा झण्डै १ अर्ब ६४ करोड ४८ लाख (शनिबारको विनियमय दर १६४.४८ लाई मान्दा) बराबर हो। एन्सेलोटी यसरी हाल विश्व फुटबलमा सबैभन्दा धेरै तलब पाउने राष्ट्रिय टिम प्रशिक्षक बनेका छन्। दोस्रो स्थानमा छन्, इङ्ल्यान्डका प्रशिक्षक थोमस टुचेल।

उनको वार्षिक तलब ५.९ मिलियन युरो छ। जर्मनीका प्रशिक्षक जुलियन नागेल्सम्यान तेस्रो स्थानमा छन्। उनले ५ मिलियन युरो तलब बुझ्छन्। यो सूचीमा विशेष कुरा के छ भने पछिल्लो विश्वकप विजेता अर्जेन्टिनाका प्रशिक्षक लिओनल स्कालोनी यस सूचीको दशौं स्थानमा छन्।

उनको वार्षिक तलब २.३ मिलियन युरो मात्र छ। अन्य उल्लेखनीय नाममा फ्रान्सका डिडिएर डेसच्याम्प, पोर्चुगलका रोबर्टो मार्टिनेज, उरुग्वेका मार्सेलो बिएल्सा, नेदरल्यान्ड्सका रोनाल्ड कोम्यान र पाराग्वेका गुस्ताभो अल्फारो छन्।

क्लब फुटबलबाट राष्ट्रिय टिमको यात्रामा प्रवेश गरेका एन्सेलोटीमाथि ब्राजिललाई पुनः विश्व फुटबलको शिखरमा पुर्‍याउने जिम्मेवारी छ। अब हेर्न बाँकी छ सर्वाधिक तलब पाएका यी मास्टरमाइन्डले ब्राजिललाई फेरि च्याम्पियन बनाउन सक्छन् कि सक्दैनन्।