दक्षिण कोरियाविरुद्ध ब्राजिलको अहिलेसम्मकै ठूलो जित

काठमाडौं। ब्राजिलको लगातार आक्रमणमा दक्षिण कोरिया पुरै दबाबमा परेको थियो। खेलको नतिजा पनि त्यसको स्पष्ट संकेत दिन्छ। एसियाली देश कोरियाको पोस्टमा ब्राजिलले ५ गोल गरेको छ। त्यसको तुलनामा सोन ह्युंग मिनको टोलीले खासै केही गर्न सकेन। एउटा मात्र प्रहार ब्राजिलका गोलरक्षक बेन्तोले फर्काइदिए।

सियोल विश्वकप स्टेडियममा भएको मैत्रीपूर्ण खेलमा ब्राजिलले यस्तो नतिजा निकालेको हो। दक्षिण कोरियाविरुद्ध यो ब्राजिलको अहिलेसम्मकै ठूलो जित हो। यसअघि २०२२ मा ५–१ को जित ब्राजिलको सबैभन्दा ठूलो जित थियो। खेलमा एस्तेभाओ विलियन र रोड्रिगोले दुई–दुई गोल गरे भने अर्को गोल भिनिसियस जुनियरले गरेका छन्।

खेलको १३औं मिनेटमै ब्राजिलले पहिलो गोल गर्‍यो। ब्रुनो गुइमारेसले दिएको पास डिफेन्स चिर्दै एस्तेभाओकोमा पुग्यो। उनले सजिलै नियन्त्रण लिए र अगाडि गोलरक्षक मात्रै थिए। एस्तेभाओले हल्का चिप हानेर बललाई जालमा पठाए।

४०औं मिनेटमा ब्राजिलले दोस्रो गोल गर्‍यो। दायाँपट्टि सुरु भएको आक्रमण बायाँपट्टि पुगेको थियो। भिनिसियसले डि–बक्स बाहिर रहेका रोड्रिगोलाई पास दिए। रोड्रिगोले तुरुन्तै बल कासेमिरोलाई दिए र फेरि पास फर्केपछि दुई डिफेन्डर छलाएर गोल गरे।

दोस्रो हाफ सुरु भएपछि ब्राजिलले झनै आक्रामक खेल देखायो। सुरुका पाँच मिनेटमै दुई गोल थपियो। ४७औं मिनेटमा कोरियाली डिफेन्डर किम मिन–जाइले क्लियर गर्न खोजेको बल एस्तेभाओले लिने मौका पाए र उनले आफ्नो दोस्रो गोल पूरा गरे।

४९औं मिनेटमा कासेमिरोले भिनिसियसलाई पास दिए र उनले रोड्रिगोलाई बल दिए। रोड्रिगोले सानो प्रहारमा सजिलै गोल गरे। ७७औं मिनेटमा ब्राजिलले अन्तिम अर्थात् पाँचौं गोल गर्‍यो।

त्यतिबेला दक्षिण कोरियाका धेरै खेलाडी ब्राजिलको भागमा थिए। ब्राजिलले काउन्टर एट्याक गर्‍यो। म्याथियस कुन्हाले बीच मैदानबाट लामो पास दिए, जुन भिनिसियसले नियन्त्रणमा लिए। उनले डि–बक्ससम्म बल लगेर एक डिफेन्डर र गोलरक्षकलाई छलाउँदै उत्कृष्ट गोल गरे।