कम उमेरका कारण यमलले बालोन डी’ओर जित्न सकेनन् !

काठमाडौं। यस वर्षको बालोन डी’ओरको मुख्य प्रतिस्पर्धा पेरिस सेन्ट–जर्मेन (पीएसजी) तथा फ्रेन्च स्टार उस्मान डेम्बेले र बार्सिलोनाका युवा स्पेनिस खेलाडी लामिन यमलबीच भएको थियो।

अन्ततः डेम्बेले पहिलो पटक यो प्रतिष्ठित पुरस्कार जिते। तर, ला लिगाका अध्यक्ष जाभियर तेबासले भने उमेर कम भएको कारण यमलले बलोन डी’ओर जित्न नसकेको तर्क गरेका छन्।

उनले भने,‘यदि उनको उमेर २३ वर्षभन्दा बढी भएको भए निश्चित रूपमा बालोन डी’ओर पनि उनले जित्थे। तर, कम उमेरका कारण उनलाई कोपा ट्रफी दिइएको हो।’

यमलले पनि कम योगदान दिएका थिएनन्। उनले ५५ खेलमा १८ गोल गर्दै बार्सिलोनालाई ला लिगा, स्पेनिस सुपर कप र कोपा डेल रे जिताउन महत्त्वपूर्ण भूमिका खेलेका थिए। तर, च्याम्पियन्स लिगको सेमिफाइनलमा इन्टर मिलानसँग पराजित भएपछि एक दशकपछि क्याटलान क्लबको फाइनल पुग्ने सपना अधुरो रह्यो।

बार्सिलोना अध्यक्ष जोन लापोर्टाका अनुसार डेम्बेलेले जित्नुको मुख्य कारण च्याम्पियन्स लिगमा देखाएको प्रदर्शन हो। डेम्बेले ५३ खेलमा ३५ गोल गर्दै पीएसजीलाई पहिलो पटक च्याम्पियन्स लिगसहित ट्रेबल उपाधि जिताएका थिए।

गत जुलाईमा १८ वर्ष पूरा गरेका यमलले भने बार्सिलोनालाई ला लिगा र कोपा डेल रे जिताउन मद्दत गरेका थिए। साथै उनले क्लबलाई च्याम्पियन्स लिग सेमिफाइनलसम्म पुर्‍याए। अन्तर्राष्ट्रिय स्तरमा उनले सन् २०२४ को जुलाईमा स्पेनलाई युरोपियन च्याम्पियनसिप जिताउन महत्त्वपूर्ण योगदान दिएका थिए।

तेबासले भन्छन्,‘यदि यमलले यस फर्म कायम राख्न सक्छन् भने छिट्टै उनले बालोन डी’ओर जित्नेमा कुनै शंका छैन।’