सन्न्यास लिँदै बुस्केट्स

काठमाडौं। स्पेन राष्ट्रिय टोली तथा बार्सिलोनाका पूर्वमिडफिल्डर सर्जियो बुस्केट्सले सन्न्यास लिने तयारी गरेका छन्।

इन्टर मियामीबाट खेलिरहेका उनले यो सिजनको अन्त्यसँगै सन्न्यास लिने निर्णय लिएको स्पेनिस सञ्चारमाध्यम कोपका खेल पत्रकार नाचो गार्सियाले बताएका छन्।

गार्सियाका अनुसार बुस्केट्सले २०२५ को अन्त्यतिर मियामीसँगको सम्झौता सकिएपछि औपचारिक रूपमा सन्न्यास घोषणा गर्नेछन्। २०१० को विश्वकप विजेता यी स्पेनिस मिडफिल्डरले गत वर्ष नै आफू करिअरको अन्तिम चरणमा पुगेको संकेत गरेका थिए। यद्यपि उनले अझै औपचारिक घोषणा भने गरेका छैनन्।

३७ वर्षे बुस्केट्स बार्सिलोनाबाट मात्रै ३२ उपाधि जितेका छन् र स्पेनको जर्सीमा १४३ खेल खेलेका छन्। बार्सिलोनाकै पूर्वफरवार्ड लिओनल मेसीको बाटो समातेर दुई वर्षअघि उनी मियामी पुगेका थिए।

बुस्केट्सको सन्न्याससँगै फुटबलले इतिहासकै सबैभन्दा बुद्धिमान र उपाधिका हिसाबले सफल मिडफिल्डरमध्ये एकलाई गुमाउनेछ। मियामीका लागि यो ठूलो धक्का हुने अपेक्षा छ। मेसी र जोर्डी अल्बासँगै उनी क्लबको बार्सिलोनाप्रेरित परियोजनाका मुख्य स्तम्भ थिए।

ला मासिया एकाडेमीमार्फत करिअर सुरु गरेका बुस्केट्सले २००८ मा पेप गार्डियोला प्रशिक्षक भएको समयमा बार्सिलोनामा डेब्यु गरेका थिए। उनले क्लबको तेस्रो सर्वाधिक ७२२ खेल खेलेका छन्। बार्सिलोनाको टिकीटाका शैलीका प्रतीक मानिने उनले ९ ला लिगा र ३ च्याम्पियन्स लिग उपाधि जितेका छन्।

सन्न्यासपछि उनी पुनः बार्सिलोनामै प्रशिक्षक वा एम्बासेडरको भूमिकामा फर्किन सक्ने सम्भावना छ। अब भने अन्तिम मिसनमा बुस्केट्स आफ्नो टोली मियामीलाई पहिलो पटक एमएलएस कप जिताउन चाहन्छन्।

हाभियर मास्चरानोको प्रशिक्षणमा रहेको मियामी हाल २८ खेलपछि इस्टर्न कन्फरेन्सको पाँचौं स्थानमा छ। पछिल्लो खेलमा मेसीको जादूमयी प्रदर्शनमा डीसी युनाइटेडलाई ३–२ ले हराएको थियो।