पूर्वप्रधानमन्त्री प्रचण्डद्वारा भक्त राना स्मृति चेसको उद्घाटन

काठमाडौं । अखिल नेपाल चेस संघ (एन्का) को आयोजनामा पूर्वछापामार भक्त रानाको स्मृतिमा दुई लाख चार हजार रुपिया पुरस्कारको ‘भक्त राना स्मृति खुला र्यापिड चेस प्रतियोगिता’ दुई सय २१ खेलाडीको प्रतिस्पर्धासँगै वुधबार सुरु भएको छ ।

पूर्वप्रधानमन्त्री एवम् नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले होटल रोयल एयरपोर्टमा आयोजित प्रतियोगिताको उद्घाटन गरे ।

उनले जनयुद्धमा सहभागि छापामार र चेसवीच गहिरो सम्बन्ध भएको पनि बताए । प्रतियोगिताको उद्घाटन समारोहमा पूर्वगृहमन्त्री शक्तिबहादुर बस्नेत, संघीय सांसद सूर्यमान दोङ तामाङ, एन्का अध्यक्ष दिप्न राई, नेपाल बुद्धिचाल महासंघकी उपमहासचिव मोनालिशा खम्बूलगायत उपस्थित थिए ।

जनयुद्धमा गोली लागेर घाइते भएका रानाको निधन २०८१ साल भाद्र ११ गते भएको थियो । फिडे रेटिङ १९०० मुनिका खेलाडी सहभागि दुई दिने प्रतियोगिता स्वीस प्रणालीको आधारमा नौ चरणमा सञ्चालन हुँदैछ । पहिलो दिन तीन चरणको खेल सकिँदा १९ खेलाडीले शतप्रतिशत जितसहित तीन–तीन अंक जोडेका छन् ।

यसक्रममा सुमन लामा, नवीन तण्डुकर, उमेश राई, दीपक महर्जन, लोकबहादुर गोले, खोमप्रसाद तिमल्सिना, सुनिल घिमिरे, सुशील सुवेदी, राजेश क्याप्छाकी, जेनेशलाल श्रेष्ठ, सन्देश श्रेष्ठ, हेमराज भण्डारी, कविन्द्र सिवाकोटी, मिसन दाहाल, निखिल चौधरी, जगन्नाथ ताम्राकार, चुडामणि कुलुङ राई, सचिनकुमार चौधरी र एसडी तुलाधरले सुरुआती तीनै चरणमा जित हात पारे । बाँकी ६ चरणका खेल दोस्रो दिन विहीबार सञ्चालन गरिनेछ ।

दस मिनेट र इन्क्रिमेन्ट १० सेकेन्डको र्यापिड चेसमा विजेताले ३० हजार, उपविजेताले २० हजार, तेस्रो हुनेले १५ हजार, चौथोले १० हजार, पाँचौंले ८ हजार र शीर्ष दसमा अटाउनेले जनही ६ हजार रुपिया पाउनेछन् ।

महिला, अनरेटेड, यू ८, यू १०, यू १२, यू १४, यू १६, यू १८, सातै प्रदेशका उत्कृष्ट खेलाडी, रेटिङ १८०० मुनि र १७०० मुनिका उत्कृष्ट गरी ३२ खेलाडीले नगद पुरस्कार प्राप्त गर्नेछन् ।