काठमाडौं। नेयमारले आउने हप्ताका चिली र बोलिभियाविरुद्धका ब्राजिलका अन्तिम दुई विश्वकप छनोट खेल गुमाउने भएका छन्। यससँगै उनको अन्तर्राष्ट्रिय अनुपस्थिति करिब दुई वर्षसम्म लम्बिने भएको छ।
मुख्य प्रशिक्षक कार्लो एन्सेलोटीले सोमबार घोषणा गरेको २३ सदस्यीय टोलीमा सान्तोसका स्टार नेयमार परेनन्। गत हप्ता खुट्टामा लागेको सामान्य मांसपेशी चोटलाई कारण देखाउँदै एन्सेलोटीले उनीलाई टोलीबाहिर राखेका हुन्।
ब्राजिल पहिले नै २०२६ विश्वकपको टिकट पक्का गरिसकेको छ। अक्टोबर सन् २०२३ मा घुँडाको लिगामेन्ट च्यातिएपछि नेयमारले अहिलेसम्म राष्ट्रिय टोलीको जर्सी लगाएका छैनन्।
“नेयमारले गत हप्ता चोट खेपेका छन्। यी अन्तिम दुई खेल निकै चुनौतीपूर्ण छन्, त्यसैले हामीलाई उत्कृष्ट अवस्थामा रहेका खेलाडी चाहिन्छ,” एन्सेलोटीले पत्रकार सम्मेलनमा भने।
३३ वर्षीय नेयमारको क्षमताबारे कुनै शंका नरहेको उनले बताए। उनले भने, “नेयमारलाई परीक्षण गर्ने आवश्यकता छैन। हामी सबैलाई थाहा छ उनी को हुन् र के गर्न सक्छन्। तर, उनी पूर्ण फिट अवस्थामा हुनुपर्छ ताकि टोलीलाई अधिकतम योगदान दिन सकून्।”
साउदी अरबबाट फर्केर आफ्नो बाल्यकालको क्लब सान्तोसमा खेलेका नेयमारले यो सिजन १९ खेलमा ६ गोल गरेका छन्। तर, गत आइतबार भास्कोविरुद्धको ६–० को लज्जास्पद हारपछि मैदानमै आँसु झार्दै बाहिरिनुले उनले अझै सामना गरिरहेको कठिनाइलाई देखाउँछ।
एन्सेलोटीले घोषणा गरेको टोलीमा अनुभवी खेलाडी एलिएसन, मार्क्विन्होस, कासेमिरोजस्ता नामसँगै उदाउँदा प्रतिभा चेल्सीका किशोर एस्टेभाओ र लामो समयपछि फर्किएका वेस्ट ह्यामका लुकास पाक्वेटा पनि परेका छन्।
