काठमाडौं। रियल मड्रिडका प्रशिक्षक जाबी अलोन्सोले ला लिगाको खेलमा भिनिसियस जुनियरलाई बेन्चमा राखेर सुरुआत गरेका थिए।
तर, दोस्रो हाफमा मैदान प्रवेश गरेपछि ब्राजिलियन स्टारले निर्णायक भूमिका खेले। उनले एक गोल बनाउन सहयोग गरे र अर्को गोल आफैं गरे। योसँगै मड्रिडले नवप्रवेशी ओभिएदोमाथि ३–० को सहज जित निकाल्यो।
फ्रान्सेली स्ट्राइकर किलियन एमप्पेले मड्रिडका लागि दुई गोल गरे। दुई खेलमै शतप्रतिशत जित हासिल गर्ने क्लबमध्ये मड्रिड पनि एक हो। तर, शीर्ष स्थान भने भिल्लारियलले हात पार्यो, जसले गिरोनामाथि ५–० को सानदार जित निकाल्यो।
अर्को खेलमा ओसासुनाले भ्यालेन्सियालाई १–० ले हरायो भने रियल सोसिडाडले दुई गोलले पछि परेको अवस्थाबाट फर्केर एस्पान्योलसँग २–२ को बराबरीमा रोक्यो।
भिनिसियसलाई सुरुआती रोजाइमा उनका ब्राजिलियन सहकर्मी रोड्रिगोले प्रतिस्थापन गरेका थिए। क्लब वर्ल्डकपको उद्घाटन खेलयता पहिलो पटक प्रतिस्पर्धात्मक खेल सुरु गरेका रोड्रिगोले पहिलो हाफमा केही अवसर सिर्जना गरे पनि गोल गर्न भने सकेनन्।
खेलको नियन्त्रण भने स्पष्ट रूपमा पाहुना टोली मड्रिडकै हातमा थियो। तर, अग्रता भने अर्को स्टार एमबाप्पेले दिलाए। खेलको ३७औं मिनेटमा आर्दा गुलरको पासलाई सुन्दर रूपमा नियन्त्रण गर्दै उनले फर्केर फिनिस गरे र बललाई टाढाको कुनामा पठाए।
पहिलो हाफमा मड्रिडले १७ प्रहार गरेको थियो भने ओभिएदोले मात्र एक। त्यसैले अर्को गोल आउनु स्वभाविक थियो। भयो पनि त्यस्तै। ६३औं मिनेटमा रोड्रिगोलाई मैदान छाडेर भिनिसियस भित्रिएपछि गोल निस्कियो।
खेलको ८३औं मिनेटमा उनले बीच मैदानमै बल खोसेर एमप्पेलाई पास दिए, जसले लो शट प्रहार गर्दै दोस्रो गोल गरे। इन्जुरी समयमा भने भिनिसियसले आफैं गोल गरे। काउन्टर अट्याकमा उनले अवसर पाउँदै सहज फिनिस गर्दै स्कोरलाई ३–० मा पुर्याए।
