काठमाडौं। क्रिस्टियानो रोनाल्डोले शनिबार ऐतिहासिक कीर्तिमान बनाएका छन्।
उनले चार फरक क्लबका लागि १०० प्रतिस्पर्धात्मक गोल पूरा गर्ने पहिलो खेलाडी बन्न सफल भएका छन्। तर, साउदी सुपर कपको फाइनलमा अल–अहलीसँग अल–नसार पेनाल्टी सुटआउटमा पराजित भएसँगै उपाधिबाट बञ्चित भयो।
हङकङ स्टेडियममा भएको खेलको पहिलो हाफमै गोल गर्दै ४० वर्षीय रोनाल्डोले डिसेम्बर सन् २०२२ देखि खेलेको साउदी क्लब अल–नसारका लागि आफ्नो शतकीय गोल पूरा गरे।
यसअघि उनले रियल मड्रिडका लागि ४५०, म्यानचेस्टर युनाइटेडका लागि १४५ र युभेन्ट्सका लागि १०१ गोल गरेका थिए। यस उपलब्धिसँगै उनले तीन फरक क्लबका लागि १०० बढी गोल गरेका इसिद्रो लाङ्गारा, रोम्यारियो र नेयमारलाई पछि पारे।
अन्तर्राष्ट्रिय फुटबलमा समेत १३८ गोलसहित रोनाल्डो इतिहासकै सर्वाधिक गोलकर्ता हुन्। यद्यपि, उनले अझै साउदी अरबमा ठूलो उपाधि जित्न सकेका छैनन्।
शनिबारको फाइनलमा उनले ४१औं मिनेटमा पेनाल्टीमार्फत अल–नसारलाई अग्रता दिलाए। तर, छिट्टै फ्र्याङ्क केस्सीले अल–अहलीलाई बराबरीमा फर्काए।
खेलको अन्त्यतिर ८३औं मिनेटमा मार्सेलो ब्रोजोभिचले गोल गर्दै अल–नसारलाई फेरि अग्रता दिलाए। तर, थपिएको समयमा ब्राजिलियन डिफेन्डर इबानेजले हेडरमार्फत गोल गर्दै खेललाई २–२ मा पुर्याए।
पेनाल्टी सुटआउटमा रोनाल्डोले गोल गरे पनि उनका सहखेलाडी अब्दुल्लाह अल–खैबारी चुके। अन्ततः अल–अहलीले ५–३ को जित निकाल्दै सिजनको पहिलो ट्रफी उचाल्यो।
