काठमाडौं। साफ यु–१७ महिला च्याम्पियनसिपमा नेपालको नजर अब आइतबार हुने अर्को ठूलो खेलतर्फ केन्द्रित छ। त्यो खेल हो, बंगलादेशविरुद्ध।
दुईपल्टको विजेता र तीनपल्टको उपविजेता बंगलादेश उमेरसमूहको प्रतियोगितामा बलियो टोली हो।
इतिहासले पनि यो तथ्यलाई प्रमाणित गर्छ। नेपाल र बंगलादेशबीच अहिलेसम्म भएका ६ भेटमा चारपटक बंगलादेशले जित निकालिसकेको छ। नेपालले मात्र एकपटक जित हात पारेको छ भने अर्को खेल बराबरीमा टुंगिएको छ। यही कारण नेपालका लागि यो खेल सामान्य छैन।
नेपालका प्रशिक्षक चेतनारायण श्रेष्ठ अहिले यही खेललाई ध्यानमा राखेर तयारीमा जुटिरहेका छन्। भुटानसँगको खेलपछि उनले भनेका थिए,‘हामीले डिफेन्स कसरी व्यवस्थित गर्ने भन्ने विषयमा विशेष ट्रेनिङ गर्नेछौं। नानीहरूलाई त्यसैअनुसार सिकाउने तयारी छ।’
उनको आवाजमा सावधानी मिसिएको छ। कारण स्पष्ट छ, बंगलादेशको फरवार्ड लाइन अहिले दक्षिण एसियामै उत्कृष्ट मानिन्छ। पहिलो खेलमा भुटानलाई ३–१ ले हराएको टोलीले भारतलाई समेत बलियो चुनौती दिएको थियो। यद्यपि, अन्ततः २–० ले पराजित भए।
नेपालले भने यसअघि च्याम्पियनसिपको सुरुआत निराशाजनक ढंगले गरेको थियो। पहिलो खेलमा भारतविरुद्ध ७–० को हारले सम्पूर्ण टोलीको आत्मबलमा धक्का पुर्यायो। हारको पीडा खेलाडीहरूको अनुहारमै झल्किएको थियो। तर, दोस्रो खेलमा भुटानमाथि २–१ को जितले त्यो पीडालाई केही हदसम्म कम गरेर आत्मविश्वास फर्काइदिएको छ।
खेलपछि ड्रेसिङ रुममा हाँसो सुन्न सकिएको थियो, जुन भारतविरुद्धको खेलपछि हराएको जस्तो भएको थियो। तर, भुटानविरुद्धको जितले मात्रै सुरक्षित महसुस गर्न सकिँदैन।
प्रशिक्षक श्रेष्ठ भन्छन्,‘भारतविरुद्ध हारपछि हामीले टोलीलाई मनोवैज्ञानिक रूपमा उठ्न धेरै मिहिनत गर्नुपर्यो। भुटानविरुद्धको नतिजाले आत्मबल बढाएको छ तर वास्तविक परीक्षा अझै बाँकी छ।’
नेपालका खेलाडीहरू पनि अब सजग छन्। उनीहरूलाई थाहा छ, बंगलादेशसँग खेल्दा एक क्षणको ध्यान भंगले गोल खानु पर्ने सम्भावना हुन्छ। साफ महिला यु-२० च्याम्पियनसिपमा पनि त्यस्तै हुँदा नेपालले ३-२ को हार बेहोर्न परेको थियो। त्यसैले मैदानमा संवाद र एकअर्कासँगको सहकार्यलाई प्राथमिकता दिनुपर्नेछ। डिफेन्समा गल्ती नगर्ने दबाब छ भने आक्रमणमा भेटिएका अवसरलाई गुमाउने ठाउँ छैन।
अबको खेल नेपालका लागि अंकको मात्र होइन, आत्मसम्मानको पनि लडाइँ हुनेछ। पहिलो खेलमा भारतसँगको ठूलो हारले आलोचना खेपिसकेको टोलीले भुटानविरुद्ध जित निकालेपछि आशा जगाएको छ। त्यो आशालाई बंगलादेशविरुद्ध टिकाइराख्न सक्ने हो भने नेपाली टोलीले प्रतियोगितामा नयाँ मोड दिन सक्छ।
यो खेलले इतिहासलाई उल्टाउने सम्भावना बोकेको छ। नेपाललाई अझै सजिलो छैन, तर प्रशिक्षक र खेलाडीहरूको लक्ष्य एउटै दिशातर्फ छन्—बंगलादेशलाई जसरी पनि हराउनै पर्छ।
स्ट्राइकर यमकुमारी विक यसमा कुनै कसर बाँकी नराख्ने बताउँछिन्। उनी भन्छिन्,‘हामी अबका खेलमा जित निकाल्नेछौं। त्यसका लागि अझै धेरै मिहिनेत गर्छौं।’
