ओलम्पिक भवनबाट तदर्थ कमिटीको पत्रकार सम्मेलन  

काठमाडौं । नेपाल ओलम्पिक कमिटीको तदर्थ कमिटीले मंगलबार ओलम्पिक भवन सातदोबाटोमा पत्रकार सम्मेलन राखेको छ । 

ओलम्पिकमा आबद्ध २३ भन्दा बढी संघ मिलेर बनाएको तदर्थ कमिटीले ओलम्पिक भवनमा पत्रकार सम्मेलनको आयोजना गरेर आगामी रोडम्यापको बिषयमा जानकारी दिन लागेका हुन् ।

पत्रकार सम्मेलन मंगलबार दिउँसो २ बजे ओलम्पिक भवन ललितपुर सातदोबाटोस्थित केन्द्रिय कार्यालयमा राखिएको छ । 

नेपाली खेलकुदको कार्यकारी निकाय राष्ट्रिय खेलकुद परिषदले आईतबार मात्र ओलम्पिक भवनमा लागेको ताला खोलेर तदर्थ कमिटीलाई साँचो हस्तान्तरण गरेको थियो ।

परिषद्को १ सय १९ औं बोर्ड बैठकले जीवनराम श्रेष्ठले गराएको निर्वाचनलाई अवैधानिक र गैरकानुनी भन्दै सो निर्वाचनलाई खारेज गरेको थियो । सरकारले ओलम्पिक निर्वाचनलाई खारेज गरेपछि ओलम्पिकमा आबद्ध २३ खेल संघले तदर्थ कमिटी बनाएर ओलम्पिक अभियानलाई अघि बढाउने तयारी गरेका हुन् ।

पत्रकार सम्मेलनबाट तदर्थ कमिटीका बाँकी सदस्यको नामावली समेत सार्वजनीक गर्ने तयारी छ । संयोजकमा नेपाल ओलम्पिकका पूर्व अध्यक्ष धुव्रबहादुर प्रधान र प्रवक्तामा समिम मियाँ अन्सारीको नाम सार्वजनीक गरेको तदर्थ कमिटीले ९ सदस्यीय टिममा बाँकीको नाम सार्वजनीक गरेको थिएन ।

स्रोतका अनुसार ओलम्पिकका पूर्व उपाध्यक्ष सुनिलकुमार श्रेष्ठ, महासचिव निलेन्द्रराज श्रेष्ठ, एथलेटिक्सका राजीव बिक्रम शाह, घोडचढीका रविराज राजकर्णिकार, पुष्पदास श्रेष्ठ लगायतलाई कमिटीका सदस्यहरुमा समावेश गरिएको छ । 

ओलम्पिकको विवादीत निर्वाचनमा अदालतको निर्णय आउन बाँकी छ । अदालतको विषयमा क्लियर नभएसम्म ओलम्पिक निर्वाचनमा अन्तराष्ट्रिय ओलम्पिक कमिटीले प्रतिक्रिया दिन अस्विकार गर्दै आएको थियो । अदालतको आदेश र सरकारको निर्देशनलाई बेवास्ता गर्दै जीवनराम श्रेष्ठले ओलम्पिकको निर्वाचनबाट आफुलाई अध्यक्षमा घोषणा गरेपछि ओलम्पिक विवाद उत्कर्षमा छ ।