काठमाडौं। ब्लेक म्याकडोनाल्ड र थोमस रोजर्सको अर्धशतकसँगै मेलबर्न स्टार्स एकेडेमीले नेपाललाई टप इन्ड टी–२० सिरिजमा १७६ रनको विशाल लक्ष्य दिएको छ।
टस जितेर पहिला ब्याटिङ थालेको मेलबर्नले निर्धारित २० ओभरमा सात विकेट गुमाउँदै १७५ रन बनाएको हो।
मेलबर्नका म्याकडोनाल्डले सर्वाधिक ७४ रन बनाए। ४७ बल खेलेका उनले सात चौका र दुई छक्का प्रहार गरे।
ओपनर थोमसले ४६ बलमा सात चौका र एक छक्कासहित ६५ रन बनाए। यी दुईले दोस्रो विकेटका लागि १२२ रनको विशाल साझेदारी गरेका थिए।
१३.१ ओभरमा सन्दीप लामिछानेको बलमा भीम सार्कीले म्याकडोनाल्डलाई क्याच गर्दै आउट गरेर यो साझेदारी तोडे।
अन्य ब्याटरको राम्रो प्रदर्शन हुन सकेन। नेपालका सन्दीप लामिछानेले सर्वाधिक तीन विकेट लिए। सोमपाल कामी र शहाब आलमको नाममा समान एक विकेट रह्यो।
