बाबर र रिजवान एसिया कप खेल्ने टोलीमा परेनन्

काठमाडौं। पाकिस्तान क्रिकेट बोर्ड (पीसीबी) ले आगामी युएईसँगको त्रिकोणात्मक सिरिज र एसिया कप प्रतियोगिताका लागि १७ सदस्यीय टोली घोषणा गरेको छ। यसपटक टोलीमा बाबर आजम र मोहम्मद रिजवान अटाएका छैनन्।

पाकिस्तान टोलीको नेतृत्व सलमान आगाले गर्ने भएका छन्। उनलाई पहिलो पटक यति ठूलो जिम्मेवारी दिइएको हो। बाबरले अन्तिम पटक सन् २०२४ डिसेम्बरमा टोलीको प्रतिनिधित्व गरेका थिए।

यसपछिको २०२५ पाकिस्तान सुपर लिग (पीएसएल) मा उनले पेशावर जल्मीबाट सात खेल खेलेका थिए। यद्यपि, हालै सम्पन्न वेस्ट इन्डिजविरुद्धको एकदिवसीय सिरजमा उनको प्रदर्शन साधारण रह्यो।

रिजवान पनि पछिल्ला महिनामा टी–२० आई टोलीबाहिर रहेका छन्। वेस्ट इन्डिज र बंगलादेशविरुद्धका सिरिजमा उनलाई अवसर दिइएको थिएन।

तर, उनी वेस्ट इन्डिजविरुद्धको एकदिवसीय श्रृंखलामा कप्तान बनेका थिए। पहिलो खेलमा ५३ रन बनाएका रिजवानले त्यसपछि मात्र १६ र ० रनको स्कोर गरेका थिए।