काठमाडौं। अमेरिकामा बसोबास गर्दै आएका फुटबलर जैय्यान अहमद बंगलादेश यु–२३ राष्ट्रिय टोलीको तयारी क्याम्पमा सहभागी भएका छन्।
टोलीले आगामी सेप्टेम्बरमा हुने एएफसी यु–२३ एसियन कप छनोटको तयारी गरिरहेको छ। बंगलादेश फुटबल महासंघ (बीएफएफ) ले पछिल्लो समय सुरु गरेको प्रवासी खेलाडीहरूलाई राष्ट्रिय टोलीमा समावेश गर्ने नितिलाई निरन्तरता दिएको छ। सोही नितिअनुसार उनलाई क्याम्पमा राखिएको हो।
यु–२३ टिमका लागि चार जना प्रवासी खेलाडीहरू बोलाइएका छन्, जसमा जैय्यान पहिलो खेलाडी हुन्। बाँकी तीन खेलाडी चाँडै क्याम्पमा आउने बीएफएफले जनाएको छ।
यसअघि इङ्ल्यान्डमा जन्मिएका हम्जा चौधरी र क्यानडामा जन्मिएका शोमित शोमलाई बंगलादेशको सिनियर राष्ट्रिय टोलीमा समावेश गरिएको थियो। त्यसले समर्थकहरूमा व्यापक चासो र उत्साह जगाएको थियो।
यस्तै, यु–१९ टिमले पनि पछिल्लो साउथ एसियन यु–१९ च्याम्पियनसिपका लागि तीन प्रवासी खेलाडीहरूलाई बोलाएको थियो। अमेरिकामा जन्मिएका फरजाद आफताब र इटलीमा जन्मिएक अब्दुल कादिरले टोलीमा स्थान पाएका थिए भने बेलायतमा रहेका एल्मान माटिन पनि प्रारम्भिक सूचीमा थिए।
शुक्रबार राजधानीको होटलमा आयोजित क्याम्पमा २९ प्रारम्भिक खेलाडीमध्ये १९ जना रिपोर्ट गरेका छन्। सहायक प्रशिक्षक हसन अल मामुनले उनीहरूलाई स्वागत गरेका थिए। टोलीको प्रशिक्षण शनिबारदेखि सुरु हुने बताइएको छ।
बंगलादेश यु–२३ टिम छनोटको समूह ‘सी’ मा परेको छ। यो समूहमा बंगलादेशले आयोजक भियतनाम, यमन र सिंगापुरसँग प्रतिस्पर्धा गर्नेछ। खेल सेप्टेम्बर ३ देखि ९ सम्म हुनेछन्। कुल ११ समूह विजेता र चार उत्कृष्ट उपविजेतासहित १६ टिमको फाइनल चरण तय हुनेछ।
