हाकिमीमाथि बलात्कारको मुद्दा चलाउन आग्रह

काठमाडौं। मोरोक्कोका अन्तर्राष्ट्रिय फुटबलर अक्राफ हकीमीमाथि सन् २०२३ मा एक महिलामाथि बलात्कार गरेको आरोपमा आपराधिक मुद्दा चलाउन माग गरिएको छ।

फ्रान्सको अभियोजन पक्षले शुक्रबार २६ वर्षीय हकीमीमाथि मुद्दा चलाउन माग गरेका हुन्। तर, उनले उक्त आरोप अस्वीकार गर्दै आएका छन्। नानतेर अभियोजन कार्यालयले एएफपीलाई दिएको जानकारी अनुसार अनुसन्धान अधिकृतसँग उक्त मुद्दा आपराधिक अदालतमा पेश गर्न औपचारिक आग्रह गरिएको हो।

‘अब निर्णय गर्नु अनुसन्धान न्यायाधीशको जिम्मेवारी हो,’ अभियोजन कार्यालयले एक वक्तव्यमा भनेको छ। हकीमीले मे महिनामा इन्टर मिलानविरुद्ध ५–० को जितमा पहिलो गोल गर्दै पेरिस सेन्ट–जर्मेन (पीएसजी) लाई पहिलो च्याम्पियन्स लिग उपाधि जिताउन महत्त्वपूर्ण भूमिका खेलेका थिए।

सन् २०२२ को विश्वकपमा मोरोक्कोलाई सेमिफाइनलसम्म पुर्‍याउन पनि उनले उल्लेखनीय योगदान दिएका थिए। हाकिमीमाथि २०२३ मार्चमा २४ वर्षीया महिलालाई बलात्कार गरेको आरोप लगाइएको थियो। 

ती महिलाले हाकिमीले आफूलाई २५ फेब्रुअरी २०२३ मा पेरिसको उपनगर बुलेन–बिलान्कुर्तस्थित आफ्नो घरमा बोलाएको र त्यहाँ बलात्कार गरेको दाबी गरेकी थिइन्। हाकिमीको श्रीमती र बलबच्चा त्यो बेला छुट्टीमा थिए।

प्रहरी स्रोतका अनुसार ती महिलाले जनवरी २०२३ मा इन्स्टाग्राममार्फत हाकिमीलाई भेटेकी थिइन्। उनले हाकिमीले ट्याक्सीको भाडा तिरेर आफूसँग भेट्न बोलाएको, जबर्जस्ती चुम्बन गर्दै यौन सम्बन्धका लागि दबाब दिएको र त्यसपछि बलात्कार गरेको आरोप लगाएकी छन्।

ती महिलाले आफू एक साथीलाई मेसेज गरेर सहयोग माग्न सफल भएकी दाबी गरेकी थिइन्। यद्यपि, उनले औपचारिक उजुरी दिन मानेकी थिइनन्। अभियोजन पक्षले स्वतः कारबाही अघि बढाएको थियो।

‘ब्ल्याकमेलको प्रयास’ को दाबी
शुक्रबार अभियोजन पक्षको मागपछि प्रतिक्रिया दिँदै हाकिमीकी कानुनी प्रतिनिधि फेनी कोलिनले उक्त निर्णयलाई अविवेकी र प्रमाणविपरीतको भन्दै विरोध जनाइन्।

’’हामी सुरुदेखि नै जस्तै शान्त छौं,’ उनले भनिन्,’’यदि अभियोजन पक्षको मागलाई अनुसरण गरियो भने हामी सबै कानुनी विकल्प अपनाउनेछौं।’ कोलिनका अनुसार हाकिमी ‘ब्ल्याकमेलको प्रयास’को सिकार भएका हुन्।

तर, पीडित महिलाको कानुनी प्रतिनिधि राचेल–फ्लोर पार्डोले भने उक्त दाबीलाई खारेज गर्दै भनिन्, ’’यस केसमा ब्ल्याकमेलको कुनै आधार देखिँदैन।’

उनका अनुसार उनकी मुवक्किलले अभियोजन पक्षको निर्णयलाई विशाल राहतका रूपमा लिएको बताइन्। ’’बलात्कारको उजुरी गर्न आँट गर्ने महिलाहरूविरुद्ध गरिने अपहेलना र भ्रम फैलाउने अभियानलाई हामी कतैबाट पनि सहने छैनौं,’ उनले भनिन्।

हाकिमीको जन्म स्पेनको मड्रिडको उपनगर गेटाफेमा भएको हो। उनका बाबु सडकमै व्यापार गर्ने र आमा सफाईकर्मी थिइन्। दुवै मोरक्कन मूलका हुन् र सन् १९८० को दशकदेखि स्पेनमा बसोबास गर्दै आएका छन्।

हाकिमीले रियल मड्रिडको युथ एकेडेमीबाट करिअर सुरू गरेका थिए। त्यसपछि सन् २०१८ मा उनी जर्मन क्लब बोरुसिया डर्टमुन्ड पुगे, जहाँ उनले ७३ खेल खेले। सन् २०२० मा इन्टर मिलान र त्यसपछि २०२१ मा पीएसजीमा प्रवेश गरे। 

अहिले उनी क्लबका लागि अत्यन्तै महत्त्वपूर्ण खेलाडीको रूपमा स्थापित छन्। कतारमा आयोजित २०२२ को विश्वकपमा उनी मोरक्को टिमका मुख्य स्तम्भ थिए र टोलीलाई सेमिफाइनलसम्म पुर्‍याए। जुन कीर्तिमान कुनै पनि अफ्रिकी वा अरब राष्ट्रले पहिलोपटक कायम गरेको थियो।