मेसीसँग मियामीमा खेल्न २ वर्ष कुरेका पउल

काठमाडौं। अर्जेन्टिनाका स्टार मिडफिल्डर रोड्रिगो डे पउलले राष्ट्रिय टोलीमा कप्तान लिओनल मेसीसँग वर्षौं खेलिसकेका छन्। तर, उनी सधैं क्लब स्तरमै पनि मेसीसँग खेल्ने सपना देखिरहन्थे।

‘प्रत्येक पटक हामी राष्ट्रिय टोलीमा भेट्थ्यौं, त्यो अद्भुत हुन्थ्यो,’ डे पउलले अनुवादकमार्फत भने, ‘तर त्यो सधैं छोटोमै समयमा नै सकिन्थ्यो। मलाई पनि संसारकै उत्कृष्ट खेलाडीसँग नियमित रूपमा खेल्ने रहर थियो।’

मेसी सन् २०२३ मा मेजर लिग सकर (एमएलएस) को इन्टर मियामी क्लबमा आबद्ध भए। डे पउलले त्यो क्लबतर्फ ध्यान दिन थाले। आफ्नो एट्लेटिको मड्रिड क्लबको व्यस्त तालिकाबीच उनी एमएलएलका खेलहरू हेर्थे र मेसी, डेभिड बेकह्याम (क्लबका सह–मालिक) तथा इन्टर मियामीले दक्षिण फ्लोरिडामा बनाइरहेको संरचना हेरर मन मन नै मख्ख पर्थे।

पछि बेकह्यामले डे पउललाई क्लबमा आबद्ध हुने प्रस्ताव राखे। र, ३१ वर्षीय डे पउलले एमएलएसको नयाँ चुनौती स्वीकार गर्ने निर्णय गरे।

‘युरोपमा विश्वकै उत्कृष्ट लिगहरूमा खेल्न पाउनु अद्भुत अनुभव थियो,’ डे पउलले शुक्रबार बिहान एक पत्रकार सम्मेलनमा भने। उनी एक साता अघि इन्टर मियामीमा ऋणमा अनुबन्धित भएका हुन्। 

यो ऋण सम्झौता सन् २०२५ को अन्त्यसम्म चल्नेछ र सन् २०२९ सम्म स्थायी रूपमा अनुबन्ध गर्न विकल्प पनि राखिएको छ। विश्वकप विजेता तथा दुई पटकको कोपा अमेरिका च्याम्पियन डे पउलले युरोपमै केही अफर नपाएका होइनन्। 

तर, एमएलएसमा आउने चुनौती स्वीकार गर्न चाहेको बताए। ‘म यो लिगमा सिक्न चाहन्छु, यसको विकासमा सहभागी हुन चाहन्छु। हामी चाहन्छौं कि खेलाडीहरू करियरको अन्त्यतिर मात्र होइन, क्लब र सहरप्रति प्रतिबद्ध भएर यहाँ आउन्,’ उनले भने।

उनले इन्टर मियामीमा आफ्नो डेब्यु लिग्स कपमा मेक्सिकन क्लब एट्लासविरुद्ध २–१ को जितसँगै गरे। उनले आफ्नो नयाँ टोलीसँग औपचारिक रूपमा प्रशिक्षण नगरे पनि पूरा ९० मिनेट खेले।

इन्टर मियामीका प्रशिक्षक तथा अर्जेन्टिनी पूर्वकप्तान जेभियर मासचेरेनोलाई डे पउलको प्रदर्शन मन परेको थियो। उनले भने, ‘मैले अन्तिम मिनेटसम्म देख्न चाहेको त्यही प्रयास थियो। हामी चाहन्छौं कि उनी यही स्तरमा खेलून् र त्यो ऊर्जाले टोलीलाई पनि प्रभावित गरोस्।’

डे पउलले सन् २०१६ देखि २०२१ सम्म इटालियन क्लब उडनेसमा र त्यसपछि एट्लेटिकोमा खेलेका थिए। उनको करियरमा ३५६ खेलमा ४५ गोल र ५६ एसिस्ट छन्।

अब इन्टर मियामीमा आबद्ध भएर डे पउल र मेसीले सन् २०२६ विश्वकपको तयारीसँगै क्लबमा पनि सहकार्य जारी राख्न सक्नेछन्।

‘मेरो लागि सबैभन्दा महत्त्वपूर्ण कुरा अर्जेन्टिना राष्ट्रिय टोली हो,’ डे पउलले भने। उनले टोलीका मुख्य प्रशिक्षक लिओनल स्कालोनीसँग क्लबमा जानुअघि परामर्श गरेको बताए।

’उहाँले मलाई भन्नुभयो, मैले थाहा छ तिमी मैदानमा के गर्न सक्छौ। म तिमीलाई तिम्रो प्रदर्शनका आधारमा मात्र मूल्यांकन गर्छु। म यस्ता शब्दहरू सुन्न चाहन्थें,’ उनी भन्छन्।