दोस्रो पथरीशनिश्चरे गोल्डकप कार्तिकमा

पथरी, मोरङ। पथरी–११ फुटबल क्लबको आयोजनामा दोस्रो संस्करणको पथरीशनिश्चरे गोल्डकप फुटबल प्रतियोगिता कार्तिक दोस्रो सातादेखि सुरु हुने भएको छ। 

क्लबका अध्यक्ष सुमन बिकले बिहीबार प्रतियोगिता कार्तिक १५ देखि २२ गतेसम्म सञ्चालन हुने जानकारी दिएका हुन्। प्रतियोगितामा नेपालका ‘ए’ डिभिजनका दुई क्लबसहित भारतको एक र अन्य पाँच गरी जम्मा आठ टोलीको सहभागिता रहनेछ।

प्रतियोगिताको विजेताले ५ लाख र उपविजेताले २ लाख ७५ हजार रुपैयाँ पाउने छन्। विधागत पुरस्कारतर्फ सर्वोत्कृष्ट खेलाडी, उत्कृष्ट गोलकिपर, डिफेन्डर, मिडफिल्डर, फरवार्ड तथा उदयमान खेलाडीलाई पुरस्कृत गरिने आयोजकले जनाएको छ। 

प्रतियोगिताको अनुमानित लागत ६० लाख रुपैयाँ रहेको छ। पहिलो संस्करणमा ब्रिगेड ब्वाइज क्लबले संकटा क्लबलाई पराजित गर्दै उपाधि जितेको थियो। सो संस्करणमा क्रमशः ३ लाख र २ लाख रुपैयाँ पुरस्कार राशि रहेको थियो।