भुटानसँगको सम्भावित विकल्प पनि गुमाउँदै नेपाल

काठमाडौं। दक्षिण एसियाली फुटबल सुस्त गतिमा रमाइरहेका बेला श्रीलंका भने फिफा वरीयता सुधार्न आक्रामक योजनामा उत्रिएको छ।

सन् २०२५ को अन्त्यसम्म वरीयता उकास्ने लक्ष्यसहित श्रीलंकन फुटबल महासंघ (एफएफएसएल) ले अन्तर्राष्ट्रिय आमन्त्रण प्रतियोगिता आयोजना र खेल्ने तयारी गरिरहेको छ।

यता नेपाल भने तय भइसकेको २ मैत्रीपूर्ण खेल गुमाउँदै अन्तर्राष्ट्रिय खेलविहीन हुने सम्भावना उच्च छ।

अखिल नेपाल फुटबल संघ (एन्फा) ले जुलाईको दोस्रो साता सार्वजनिक गरेको बंगलादेशसँगको मैत्रीपूर्ण खेलको योजना अनिश्चितजस्तै छ। 

बंगलादेशले दक्षिण एसिया बाहिर बलियो टोलीसँग खेल्ने निर्णय गरेपछि एन्फा वैकल्पिक रूपमा भुटानसँग संवादमा जुटेको थियो।

सोमबार मात्रै अखिल नेपाल फुटबल संघ (एन्फा)का पदाधिकारी भेटेर फर्किएका बंगलादेश फुटबल फेडेरेसन (बिएफएफ) अध्यक्ष ताबिथ अवलले अब को २ दिन कुन टोलीसँग मैत्रीपूर्ण खेल खेल्ने भन्नेबारे टुंगो लगाउने बताएका छन्।

एन्फाका एक पदाधिकारीले यसअघि खेलपाटीसँग भनेका थिए,‘अरू राम्रो टोलीको प्रस्ताव छैन। तर, एन्फाले बोलायो भने भुटान आउछु भनेको छ।

तर, त्यसैबीच श्रीलंकाले सेप्टेम्बर १ देखि ९ सम्म साफ सुपर कप आयोजना गर्ने घोषणा गर्‍यो।

श्रीलंकाले माल्दिभ्स, पाकिस्तान, बंगलादेश र भुटानलाई निमन्त्रणा पठाइसकेको छ। यदि यी राष्ट्रहरूको सहमति मिल्यो भने नेपालबिनाको दक्षिण एसियाली मञ्च निर्माण हुनेछ।

योसँगै नेपाललाई ३८ वर्षे इतिहासमा पहिलोपल्ट साफ च्याम्पियनसिपको फाइनलमा पुर्‍याएर इतिहास रचेका अब्दुल्ला अल्मुतारीले सम्हालेको श्रीलंकाली टोलीको योजना, लगन र रणनीतिले नजिकका प्रतिस्पर्धीलाई पछि छाड्ने छ।

श्रीलंकाका फुटबल अध्यक्ष जसवार उमरले भने,‘हामी सन् २०२५ को अन्त्यसम्म १९४औं स्थानमा पुग्ने लक्ष्यसहित योजना बनाउँदैछौं।’ सन् २०२३ मा २०७औं स्थानमा रहेको श्रीलंका अहिले १९६औं स्थानमा उक्लिएको छ। यो ११ स्थान सुधार्न श्रीलंकालाई नियमित अन्तर्राष्ट्रिय खेलको खाँचो छ।

श्रीलंकाले ६ महिनामा कम्तीमा सातवटा अन्तर्राष्ट्रिय खेल खेल्ने लक्ष्य लिएको छ, जसमा साफ सुपर कप मुख्य केन्द्रमा छ। यो प्रतियोगिता फिफा मान्यता प्राप्त हुने भएपछि श्रीलंकालाई वरीयतामा अंक संकलन गर्न सस्तो र व्यावहारिक उपाय बन्नेछ। श्रीलंकाले यो प्रतियोगितालाई प्रतिस्पर्धा मात्र होइन, सशक्त सन्देश दिने अवसरको रूपमा लिएको छ।

त्यति बेला नेपाल भने कुनै पनि अन्तर्राष्ट्रिय खेल नखेली एसियन कप छनोटतर्फ लाग्ने अवस्थामा हुनेछ। भुटानसँग सहमति गर्न नसके, बंगलादेशसँगको खेल रद्द भए र श्रीलंकाले वैकल्पिक प्रतियोगिता सञ्चालन गरे नेपाल अन्तर्राष्ट्रिय फुटबलका घटनाक्रमहरूबाट क्रमश: अलगिँदै जाने छ।