काठमाडौं । खराब मौसमको कारण दुई घन्टा प्रभावित खेलमा शनिबार चेल्सी अतिरिक्त समयमा बेन्फिकाको चुनौती पन्छाउँदै क्लब विश्वकपको क्वाटरफाइनलमा प्रवेश गरेको छ ।
बैंक अफ अमेरिका स्टेडियम, चार्लोटमा भएको खेलमा रिस जेम्सको फ्रिकिकमा एन्जो मारेस्काले चेल्सीलाई अग्रता दिलाएका थिए । रंगशाला वरपर चट्याङ परेपछि ८६ औं मिनेटमा खेल रोकिएको थियो । त्यसको दुई घन्टापछि खेल सुचारु भयो, जसलाई बेन्फिकाले अतिरिक्त समयसम्म डोर्यायो ।
इन्ज्युरी समयको पाँचौं मिनेटमा एन्जेल डि मारियाले प्रतियोगिताको चौथो पेनाल्टी प्रहार गर्दै खेल बराबरीमा पुर्याएका थिए । अतिरिक्त समयको सुरुआतमै बेन्फिकाका सब्स्टिच्युट खेलाडी जियान्लुका प्रेस्टियानी रातो कार्ड बेहोर्दै बाहिरिएपछि खेल चेल्सीमा नियन्त्रणमा गएको थियो ।
क्रिस्टोफर एन्कुकुले गोल गर्दै एक सय आठौं मिनेटमा चेल्सीलाई फेरि अग्रता दिलाए । त्यसपछि पेड्रो नेटो र कियनन डेसबरी–हलले एक एक गोल थप्दै चेल्सीको पाल्मेइरसविरुद्ध अन्तिम आठमा प्रतिस्पर्धा गर्ने तय गरे ।
दुई ब्राजिली क्लबको प्रतिस्पर्धामा बोटाफोगोलाई पराजित गर्दै पाल्मेइरसले क्वाटरफाइनलमा स्थान बनाएको हो ।
पाल्मेइरसले लिंकन फिनान्सियल फिल्डमा पाउलिन्होले अतिरिक्त समयमा गोल गरेपछि बोटोफोगोको यात्रा अन्तिम १६ मा आएर टुंग्याइदिएको हो ।
