एमबाप्पेले खेल्नेमा अझै आशंका

काठमाडौं। स्पेनिस क्लब रियल मड्रिडका स्टार स्ट्राइकर किलियन एमबाप्पे क्लब विश्वकपका समूह चरणका तीनवटै खेल गुमाएका छन्।

गत साता गम्भीर पेटको संक्रमण (ग्यास्ट्रोएन्टराइटिस) का कारण एमबाप्पे अस्पताल भर्ना भएका थिए र अहिलेसम्म एक मिनेट पनि मैदानमा देखिएका छैनन्। यद्यपि, उनी अभ्यासमा फर्किए छन्। तर, मुख्य जाबी आलोन्सोले भने उनले अर्को चरणमा खेल्ने हुन् या होइनन् भन्नेबारे अझै स्पष्ट जवाफ दिन सकेका छैनन्। 

बिहीबार आरबी साल्जबर्गविरुद्धको ३–० को जितमा उनी बेन्चमा समेत थिएनन्। आलोन्सो भन्छन्,‘म अत्याधिक आशावादी भएर केही भन्न चाहन्न। उनी हाम्रा लागि अत्यन्तै महत्त्वपूर्ण खेलाडी हुन्, विश्वकै उत्कृष्टमध्ये एक। हामी आशा गर्छौं उनी चाँडै फर्कने छन्।’

अमेरिकामा जारी क्लब विश्वकपमा एमबाप्पे प्रमुख आकर्षणमध्ये एक हुन्। तर, उनको अनुपस्थितिले फिफाका अध्यक्ष जियानी इन्फान्टिनोको यो प्रतियोगिता विश्वकै ठूलो खेलकुद आयोजनामध्ये एक बनाउने योजनालाई धक्का पुगेको छ।

इन्फान्टिनोले प्रतियोगिता सुरु हुनु अघिनै इन्टर मियामीलाई विशेष प्रवेश दिँदै लिओनल मेसीलाई ल्याएका थिए। त्यसका साथै उनले विशेष ट्रान्सफर विन्डोमार्फत क्रिस्टियानो रोनाल्डोलाई समेत साइन गर्न क्लबहरूलाई प्रोत्साहन गरेका थिए।

तर, एमबाप्पे अहिले खेलको कारण होइन, बाहिरी विवादका कारण मात्र समाचारमा छन्। पेरिस सेन्ट–जर्मेन (पिएसजी) सँग एमबाप्पेको सम्बन्ध अहिले निकै तनावपूर्ण छ। उनले क्लबमाथि नैतिक उत्पीडनको आरोप लगाउँदै कानूनी प्रक्रिया अगाडि बढाएका छन्। 

एमबाप्पेले २०२३ मा आफ्नो सम्झौता थप नगर्ने निर्णय गरेपछि क्लबले उनलाई टोलीबाट अलग राखेको थियो। यही व्यवहारले उनले अपमानित महसुस गरेका हुन्।

त्यसका साथै एमबाप्पेले क्लबबाट ५५ मिलियन युरो (करिब ६१ मिलियन अमेरिकी डलर) तलब बक्यौता रहेको दाबी गरेका छन्। यी सबै विवादले रियलको क्लब विश्वकप जित्ने योजनामा असर पारेको छ। 

टिफेनी एण्ड कम्पनीले डिजाइन गरेको नयाँ गोल्डेन ट्रफी उठाउने सपना बोकेको रियलका लागि एमबाप्पे टिमका प्रमुख खेलाडी हुन्। गत सिजन एमबाप्पेले क्लबका लागि ५६ खेलमा ४३ गोल गरेका थिए।

रियलका अनुसार एमबाप्पे अझै विशेष उपचारमा छन् र अस्पतालबाट डिस्चार्ज भएयता दुई खेल गुमाइसकेका छन्। प्रशिक्षक आलोन्सोले अन्त्यमा भने,‘हामी उनलाई आवश्यक ठान्छौं। सक्दो चाँडो र पूर्ण फिट अवस्थामा फर्किएको हेर्न चाहन्छौं।’