नयाँ प्रशिक्षक, आक्रमक फुटबल – रेनुका नगरकोटी

काठमाडौं । राष्ट्रिय महिला फुटबल टिमकी खेलाडी रेनुका नगरकोटीले नयाँ प्रशिक्षकको नेतृत्वमा महिला टिमले फरक फुटबल खेलिरहेको बताएकी छिन् । 

एएफसी एसियन कप छनोट खेल्न उज्बेकिस्तानमा रहेकी नगरकोटीले मिडियासँग कुराकानी गर्दै नयाँ प्रशिक्षकको नेतृत्वमा फरक तरिकाले फुटबल खेलिरहेको बताईन् । 

‘नयाँ प्रशिक्षकको खेलाउने तरिका फरक छ । पहिला भन्दा नेपालको खेल धेरैनै फरक हुन्छ । सकारात्मक हिसाबको फरक तरिकाले खेलाउनुहुन्छ ।’ नयाँ प्रशिक्षकबारे रेनुकाले भनिन् ।

महिला फुटबल टिमकी पुरानी खेलाडी रेनुकाले राष्ट्रिय टिमबाट झण्डै १५ वर्ष खेलिसकेकी छिन् ।

नेपालले महिला फुटबल टिमको नयाँ मुख्य प्रशिक्षकमा पेट्रिक डी वाइल्डलाई नियुक्त गरेको छ । उनको नेतृत्वमा नेपालको महिला टिम एएफसी एसियन कप छनोट खेल्न उज्बेकिस्तानमा छ । नेपालले शीर्ष स्थान हासिल गर्न सकेको खण्डमा ऐतिहासिक रुपमा एसियन कप खेल्न छनोट हुनेछ । जुन नेपालको महिला फुटबल टिमको ऐतिहासिक सफलता र उपलब्धि हुनेछ ।

रेनुकाले नयाँ प्रशिक्षकबाट महिला टिमले आक्रमक फुटबलको अभ्यास गरिरहेको बताईन् । अन्य प्रशिक्षक डिफेन्सिभ खेलमा जोड दिने गरेको भएपनि नयाँ प्रशिक्षक आक्रमक फुटबल खेलाईरहनु भएको बताईन् । 

‘नयाँ प्रशिक्षकले अगाडी बढेर नखेलेसम्म गोल हुदैन भनेर खेलाईरहनु भएको छ । त्यो हिसाबले सकारात्मक नतिजानै आउँछ ।’ रेनुकाले भनिन् ।

पछिल्लो साढे १ दशकको महिला फुटबलको समिक्षा गदै रेनुका भन्छिन्, ‘हामीले सुरु गर्दा अहिलेको जस्तो माहोल र सुविधा थिएन । पछिल्लो समय महिला फुटबलले निकै राम्रो गरिरहेको छ ।’