पिएसजीविरुद्ध फेरि कानुनी लडाइँमा एमबाप्पे

काठमाडौं। रियल मड्रिडका फरवार्ड किलियन एमबाप्पेले पेरिस सेन्ट–जर्मेन (पिएसजी) क्लबविरुद्ध नैतिक उत्पीडनको आरोप लगाउँदै कानुनी उजुरी दर्ता गरेका छन्।

फ्रान्सको पेरिस अभियोजन कार्यालयले बिहीबार यो उजुरी परेको पुष्टि गरेको हो। रियलमा आबद्ध भइसकेका एमबाप्पेले आफ्नो पूर्वक्लब पिएसजीले ५५ मिलियन युरो (अन्दाजी ६१ मिलियन डलर) तलब नदिएको भन्दै गुनासो गरेका छन्।

एमबाप्पे क्लबबाट असन्तुष्ट छन्। २०२३–२४ सिजन सुरु हुनुअघि पिएसजीले उनलाई टिमबाट अलग राखेको थियो। उनले क्लबसँगको आफ्नो सम्झौता विस्तार नगर्ने निर्णय गरेपछि क्लबले उनलाई मुख्य टिमबाट बाहिर राखेको हो।

अभियोजन कार्यालयले जनाए अनुसार एमबाप्पेले पिएसजीमा आफूले ‘लफ्टिङ’को सिकार भएको बताएका छन्। ‘लफ्टिङ’ भन्ने शब्द फ्रान्समा खेलाडीलाई प्रशासनिक, अनुशासनजन्य वा खेलसम्बन्धी कारणले टिमबाट अलग राख्ने अभ्यासका लागि प्रयोग गरिन्छ।

एमबाप्पे गत समरमा रियलमा आबद्ध भएका थिए। पिएसजीका लागि सात वर्षमा २५६ गोल गर्दै उनी क्लबको इतिहासमै सबैभन्दा धेरै गोल गर्ने खेलाडी बनेका थिए। यस वर्ष पिएसजीले एमबाप्पेबिना नै च्याम्पियन्स लिग जितेको थियो।

तर, उनको क्लबसँगको सम्बन्ध तनावपूर्ण वातावरणमा अन्त्य भएको थियो। उनको अन्तिम घरेलु खेलमा पिएसजी समर्थकहरूले उनलाई हुर्ने गरेका थिए।

पिएसजीले सन् २०२२ मा उनलाई क्लबकै इतिहासमा सबैभन्दा ठूलो रकमको तलबसहित सम्झौता गराएका थियो। तर, एमबाप्पेले क्लबले वाचा गरेअनुसार केही मुख्य खेलाडी ल्याउन नसकेको भन्दै निराशा व्यक्त गर्दै आएका थिए। 

सन् २०२२ मा सम्झौता गर्दा उनलाई २०२५ अंकको जर्सी देखाएर प्रस्तुत गरिएको थियो। तर, त्यो सम्झौता २०२४ सम्म मात्रै रहेको र एक वर्ष थप्न खेलाडीको रोजाइमा रहेको बताइएको थियो।

सन् २०२३ को जुनमा एमबाप्पेले क्लबलाई आफूले सम्झौता नथप्ने जानकारी दिएपछि पिएसजी तनावमा आएको थियो। क्लबले उनलाई जापान र दक्षिण कोरियाको प्रि–सिजन भ्रमणमा लैजान अस्वीकार गर्‍यो। त्यसपछिका केही हप्तामा एमबाप्पे मुख्य टोलीबाट अलग्गिएर छुट्टै प्रशिक्षण गर्न बाध्य भएका थिए।

त्यही समयमा साउदी प्रो लिग क्लब अल–हिलालबाट आएको ३०० मिलियनको प्रस्तावसमेत एमबाप्पेले अस्वीकार गरेका थिए। सिजनको पहिलो खेलबाट पनि उनलाई टोलीबाहिर राखिएको थियो। तर, क्लबसँगको केही छलफलपछि उनी पुनः टोलीमा फर्किएका थिए।

एमबाप्पेले अप्रिल महिनामा आफ्नो कानुनी टोलीमार्फत क्लबविरुद्ध उत्पीडनसम्बन्धी कानुनी कदम चाल्ने घोषणा गरेका थिए। अहिले उनले सोही उजुरी पेरिस अभियोजन कार्यालयमा दर्ता गराएका हुन्।