हालान्डले गरे रोनाल्डो, मेसी र एमबाप्पेको कीर्तिमान भंग

काठमाडौं। नर्वेका तथा इङ्लिस क्लब म्यानचेस्टर सिटीका स्टार स्ट्राइकर एर्लिङ हालान्डले एक साथ तीन खेलाडीको कीर्तिमान भंग गरेका छन्।

२४ वर्षीय हालान्डले सबैभन्दा क्रिस्टियानो रोनाल्डो, लिओनेल मेसी र किलियन एमबाप्पेलाई उछि्दै सबैभन्दा कम खेलमा करिअरमा ३००औं गोल पूरा गर्ने कीर्तिमान बनाएका हुन्। 

फ्लोरिडाको क्याम्पिङ वर्ल्ड स्टेडियममा शुक्रबार बिहान सम्पन्न क्लब विश्वकपअन्तर्गत समूह ‘जी’ को खेलमा सिटीले इटालीयन क्लब युभेन्ट्समाथि ५–२ को विशाल जित हात पारेको थियो। दोस्रो हाफमा ओमार मर्मुशको स्थानमा मैदान प्रवेश गरेका हालान्डले १ गोल थपे। योसँगै उनले क्लब र राष्ट्रिय टिमका लागि ३००औं गोलको कोशेढुंगा पूरा गरे।

सिटीका मुख्य प्रशिक्षक पेप ग्वार्डिओला हालान्डको यो प्रगति असाधारण मान्छन्। उनी भन्छन्, ‘२४ वर्षको उमेरमा ३०० गोल! यो अद्भुत उपलब्धि हो। उनलाई धेरै धेरै बधाई।’ 

उनले तेस्रो टचमै गोल गरेका थिए। हालान्डले सिटीबाट १४५ खेल खेल्दै १२३ गोल गरेका छन्। मोल्डे, आरबी साल्जबर्ग, बोरुसिया डोर्टमुन्ड, सिटी र नर्वेबाट उनले कुल ३७० खेल खेल्दै ३०० गोल पूरा गरेका हुन्।

यही ३०० गोलको कोशेढुंगा पूरा गर्न पोर्चुगिज स्ट्राइकर क्रिस्टियानो रोनाल्डोलाई ५५४ खेल खेल्नुपरेको थियो। उनी हाल साउदी क्लब अल–नासरमा छन्। अर्जेन्टिना र अमेरिकी सकर लिग इन्टर मियामीका कप्तान लिओनेल मेसीले भने ४१८ खेलमा ३०० गोल गरेका थिए। फ्रान्सका कप्तान तथा स्पेनिस क्लब रियल मड्रिडका स्ट्राइकर किलियन एमबाप्पे ४०९ खेलमा ३०० गोल गरेका हुन्।

अपराजित रहँदै समूह ‘जी’ को शीर्ष स्थानमा रहेको सिटीले ९ अंक जोड्यो। अब सिटीले समूह ‘एच’ को उपविजेतासँग सोमबार ओरल्यान्डोमा प्रि–क्वार्टरफाइनलमा प्रतिस्पर्धा गर्नेछन्।

समूह ‘एच’ मा हालसम्म रियल मड्रिड अग्रता लिँदैछ भने आरबी साल्जबर्ग दोस्रो स्थानमा छ। अन्तिम चरणका खेलहरू बिहीबार साँझ हुँदैछन्।