काठमाडौं। पाल्मेइरसले क्लब विश्वकपको खेलमा अल–अहलीविरुद्ध २–० को जित निकालेको छ। वेस्साम अबु अल्लीले आत्मघाती र जोसे लोपेजले दोस्रो गोल गर्दै ब्राजिलियन टोलीलाई तीन महत्त्वपूर्ण अंक दिलाए।
पाल्मेइरसका प्रशिक्षक अबेल फेरेइराले भन्छन्, ‘रणनीतिक रूपमा हामीले मौसमलाई ध्यानमा राख्नु पर्यो। तपाईंले खेलाडीको अनुहार पढ्न सक्नुहुन्थ्यो भने थाहा पाउनुहुन्थ्यो—मौसमले उनीहरूलाई कति असर पारेको थियो।’
शुक्रबार बिहान मेटलाइफ स्टेडियममा भएको खेल केही समयको लागि गडगडाहट र मेघगर्जनका कारण स्थगित भएको थियो। दोस्रो हाफ सुरु भएको केही मिनेटमै अल–अहलीका डिफेन्डर वेस्साम अबु अल्लीले हेडरमार्फत बल आफ्नै पोस्टमा पठाउँदै आत्मघाती गोल गरे।
५९औं मिनेटमा माउरिसियोको पासमा जोसे लोपेजले बाक्सको बीचबाट बायाँ खुट्टाले प्रहार गर्दै दोस्रो गोल गरे। खेलपछि आएको करिब ५० मिनेटको मौसम व्यवधानले दुबै टोलीको लयमा असर पारेको थियो। करिब ३५ हजार दर्शकलाई सुरक्षाका लागि केही समय मैदानबाट हटाइएको थियो।
अल–अहलीका प्रशिक्षक जोसे रिभेइरोले भने,‘मौसमको कारण खेलमा ठूलो प्रभाव पर्यो। सुरुवात नै सुस्त भयो, फेरि लयमा फर्कन गाह्रो पर्यो। हाम्रो धेरै खेलाडी लामो सिजनबाट थाकेका छन्, यस्तो बाधाले अझै असर गर्छ।’
पहिलो हाफमा चारवटा पहेंलो कार्ड देखाइयो। पाल्मेइरसका राफाएल भेइगालाई ३८औं मिनेटमा रातो कार्ड दिइए पनि भिडियो रेफ्री (भिएआर) बाट जाँच भएपछि पहेंलोमा परिणत गरियो। अगस्टिन जियाई (पाल्मेइरस), याह्या अत्तियात अल्लाह र हम्दी फाथी (अल–अहली) लाई पनि पहेंलो कार्ड दिइएको थियो।
यो जितसँगै पाल्मेइरस समूह ‘ए’ को शीर्ष स्थानमा चार अंकसहित पुगेको छ। अल–अहली भने एक अंकसहित तेस्रो स्थानमा छ। अब पाल्मेइरस सोमबार फ्लोरिडाको हार्ड रक स्टेडियममा इन्टर मियामीविरुद्ध खेल्नेछ भने अल–अहलीले पोर्टोको सामना मेटलाइफ स्टेडियममा गर्नेछ।
-1750407356.webp)
