काठमाडौं। रोहित ठाकुरको अलराउन्ड प्रदर्शनसँगै बागमती प्रदेशले यु–१६ राष्ट्रिय क्रिकेट प्रतियोगितामा विजयी सुरुआत गरेको छ। बुधबार सम्पन्न खेलमा बागमतीले कोशी प्रदेशलाई १०५ रनले हराएको हो।
कोशीको यो लगातार दोस्रो हार हो। यसअघि सुदूरपश्चिम प्रदेशले गण्डकीलाई ७ विकेटले हराएको थियो।
बागमतीले दिएको २३६ रनको लक्ष्य पछ्याएको कोशीले २५.३ ओभरमा सबै विकेट गुमाउँदै १३० रन मात्रै बनाउन सक्यो।
कोशीका शिवांश बजगाईंले सर्वाधिक ५० रन बनाए। ५५ बल खेलेका उनले ६ चौका र १ छक्का प्रहार गरे। सुगम बूढाथोकी २३, सकुशल श्रेष्ठ १६ र अफान ताहिर १५ रनमा आउट भए।
बागमतीका रोहितले सर्वाधिक ३ विकेट लिए। ५ ओभर बलिङ गरेका उनले १ मेडनसहित २४ रन खर्चिए।
कमल शाही र प्रसिद्ध जैशीको नाममा समान २ विकेट रह्यो। त्यसअघि पहिला ब्याटिङ थालेको बागमतीले ४८.१ ओभरमा सबै विकेट गुमाउँदै २३५ रन बनाएको थियो।
बागमतीका राजेश बोहराले सर्वाधिक ६९ रन बनाए। ५२ बल खेलेका उनले ९ चौका र १ छक्का प्रहार गरे। रोहितले ६८ बलमा ६ चौकासहित ५७ रन बनाए।
प्रशिद्ध ३९ तथा जय थापा र इशान शाह सुवेदी १६ रनमा आउट भए। कोशीका सुयोग भट्टराई र अलिश मण्डलले समान तीन विकेट लिए।
-1757154871.jpeg)
