काठमाडौं। इन्डियन प्रिमियर लिग (आइपिएल) २०२५ को क्वालिफायर–२ मा आइतबार मुम्बई इन्डियन्स र पञ्जाब किंग्स भिड्दैछन्। खेल अहमदाबादको नरेन्द्र मोदी रंगशालामा नेपाली समय अनुसार साँझ ७:४५ बजे खेलिनेछ।
यस खेलको विजेताले जुन ३ मा हुने फाइनलमा रोयल च्यालेन्जर्स बैंग्लोरसँग प्रतिस्पर्धा गर्नेछ। बैंग्लोरले क्वालिफायर–१ जितेर फाइनलमा स्थान बनाइसकेको छ। इलिमिनेटर खेलमा गुजरात टाइटन्सलाई हराउँदै मुम्बईले क्वालिफायर-२ मा स्थान बनाएको हो।
दुवै टोली प्लेअफमा पहिलो पटक आमनेसामने हुनेछन्। यी दुवै सिजनमा दोस्रो पटक एकअर्कासँग आमनेसामने हुनेछन्। पछिल्लो पटक पञ्जाबले मुम्बईलाई ७ विकेटले पराजित गरेको थियो।
आइपिएलमा अहिलेसम्म मुम्बई र पञ्जाबबीच ३३ खेल भएको छ। मुम्बईले १७ खेल जितेको छ। बाँकी १६ खेलको नतिजा भने पञ्जाबको पक्षमा छ।
यस सिजनमा मुम्बईका लागि सबैभन्दा धेरै रन बनाएका सूर्यकुमार यादव उत्कृष्ट फर्ममा छन्। उनको अहिले १५ खेलमा ६७३ रन बनाएका छन्। सूर्य कुनै पनि टी-२० लिगको एक सिजनमा सबैभन्दा धेरै २५+ स्कोर गर्ने खेलाडी हुन्। उनले यो उपलब्धि १५ पटक हासिल गरिसकेका छन्। ओपनर रोहित शर्माले अन्तिम खेलमा गुजरातविरुद्ध उत्कृष्ट ८१ रन बनाएका थिए। उनले आइपिएलमा आफ्नो ३०० छक्का पनि पूरा गरे।
बलिङमा ट्रेन्ट बोल्टले सुरुआती ओभरमा विकेट लिइरहेका छन्। हालसम्म उनको नाममा १५ खेलमा २१ विकेट छ। उनको साथमा योर्कर बलरद्वय जसप्रीत बुमराह र मिचेल स्यान्टनर छन्।
पञ्जाबका कप्तान श्रेयस अय्यरले टोलीलाई ठूलो स्कोरमा पुर्याउने अपेक्षा गरिएको छ। क्वालिफायर–१ मा बैंग्लोरविरुद्ध एक रनमा आउट भएपछि अय्यरको टोली घरेलु मैदानमा पराजित भएको थियो। ओपनर प्रभसिमरन सिंह टोलीका शीर्ष ब्याटर हुन्। उनले १६७.८३ को स्ट्राइक रेटमा ५१७ रन बनाएका छन्। उनलाई सहयोग गर्न प्रियांश आर्य पनि छन्।
बायाँ हाते तीव्र गतिका बलर अर्शदीप सिंहले पञ्जाबका लागि प्रतियोगितामा सबैभन्दा धेरै विकेट लिएका छन्। उनले अहिलेसम्म १५ खेलमा १८ विकेट लिएका छन्। चोटपछि युजवेन्द्र चहल यस खेलबाट पुनरागमन गर्न सक्छन्। अर्शदीपबाहेक टोलीले सुरुआती ओभरमा अजमतुल्लाह उमरजाईले विकेट लिने अपेक्षा गरेको छ।
