काठमाडौं। स्कटल्यान्ड ‘ए’ सँगको दोस्रो अभ्यास खेलमा नेपालले सुधारिएको प्रदर्शन गरेको छ।
पहिला ब्याटिङ गरेको नेपालले निर्धारित ४५ ओभरमा ९ विकेट गुमाउँदै २५३ रन बनाएको हो। पहिलो खेलमा नेपालले स्कटल्यान्ड ‘ए’ले दिएको २२१ रनको लक्ष्य पछ्याएको नेपालले २९.४ ओभरमा सबै विकेट गुमाँदै ११० रनमा समेटिएको थियो। उक्त खेलमा नेपालले १०२ रनको लज्जास्पद हार बेहोरेको थियो।
यसपल्ट भने कप्तान रोहितकुमार पौडेलसहित तीन खेलाडीले अर्धशतक प्रहार गर्दै स्कटल्यान्डलाई सम्मानजनक लक्ष्य दियो।
गुल्शनकुमार झाले सर्वाधिक ६४ रन बनाए। ४७ बल खेलेका उनले ३ चौका र ५ छक्का प्रहार गरे।
रोहितले ७० बलमा ६१ रन बनाए। उनले भने ५ चौका र १ छक्का प्रहार गरे। भीम सार्कीले ५७ बलमा ७ चौका र १ छक्कासहित ५७ रन बनाए। कुशल भुर्तेल ३१ रनमा आउट हुँदा सन्दीप लामिछाने १७ रनमा अविजित रहे।
स्कटल्यान्डका जेम्स डकिनसनले २ विकेट लिए।
