पथरी। डाँस मोरङी र आयोजक कञ्चनजंघा क्रिकेट क्लब प्रथम कञ्चनजंघा क्रिकेट प्रतियोगिताको फाइनलमा प्रवेश गरेका छन्।
योसँगै दुवै टिमले कम्तीमा ३३ हजार ३ सय ३३ रुपैयाँ पक्का गरेका छन् । उपाधि विजेताले ५५ हजार ५५५ रुपैयाँ प्राप्त गर्नेछ।
पहिलो सेमिफाइनलमा डाँस मोरङीले ब्रदर्स एलेभेनलाई ५ विकेटले पराजित गर्दै फाइनल यात्रा तय गर्यो। टस हारेर पहिला ब्याटिङ गरेको ब्रदर्स एलेभेनले २० ओभरमा ५ विकेटको क्षतिमा १४४ रन बनायो। विशाल थापाले सर्वाधिक ४२ रन बनाए। आभास खनालले २८ र नीरज पाठकले ३० रनको योगदान गरे।
डाँस मोरङीका उमर सानीले २ विकेट लिए। रोहित राजवंशी र आरके मण्डलले समान १/१ विकेट लिए। १४५ रनको लक्ष्य डाँस मोरङीले १८.३ ओभरमा ५ विकेटको क्षतिमा पूरा गर्यो। रोहित राजवंशीले ४३ रनको प्रभावशाली इनिङ्स खेले।
आरके मण्डलले ३२, चन्द्र भट्टराईले २० र सुवास रोयले १९ रन बनाए। ब्रदर्स एलेभेनका करण गजमेरले २ विकेट लिए भने आभास खनाल, नीरज शाह र नीरज पाठकले समान १/१ विकेट लिए। रोहित राजवंशी ‘म्यान अफ द म्याच’ घोषित भए।
दोस्रो सेमिफाइनलमा आयोजक कञ्चनजंघा क्रिकेट क्लबले पथरीशनिश्चरे क्रिकेट क्लबलाई ५ विकेटले हरायो। टस जितेर पहिला ब्याटिङ गरेको पथरीशनिश्चरे १९.१ ओभरमा ११७ रनमै समेटियो। एन्जल राईले ३१, सोलोमन राईले १९ र नेल्सन दंगालले १८ रन बनाए।
कञ्चनजंघाका ज्ञानेन्द्र श्रेष्ठले ३ विकेट लिए भने नुरी निशार, सुरज न्यौपाने र अभिषेक लिम्बूले समान २/२ विकेट लिए। ११८ रनको लक्ष्य आयोजकले १३.३ ओभरमा ५ विकेट गुमाएर पूरा गर्यो।
सुरज न्यौपानेले उत्कृष्ट प्रदर्शन गर्दै ७९ रनको अर्धशतकिय पारी खेले। पथरीशनिश्चरेका नेलसन दंगालले ३ विकेट लिए भने सुदीप चौधरी र दीपेश भण्डारीले समान १/१ विकेट लिए। सुरज न्यौपाने ‘म्यान अफ द म्याच’ घोषित भए। फाइनल खेल जेठ १८ मा जिरीखिम्ती मैदानमा हुनेछ।
