प्लेअफमा दोस्रो पटक भिड्दै मुम्बई र गुजरात

काठमाडौं। इन्डियन प्रिमियर लिग (आइपिएल) इलिमिनेटरमा शुक्रबार मुम्बई इन्डियन्स र गुजरात टाइटन्स भिड्दैछन्।

खेल मुल्लानपुरको महाराजा यादविन्द्र सिंह अन्तर्राष्ट्रिय रंगशालामा नेपाली समय अनुसार साँझ ७:४५ बजे सुरु हुनेछ। यो खेल हार्ने टोलीको यात्रा यहीँ समाप्त हुनेछ र विजेता टोलीले क्वालिफायर–२ खेल्नेछ। दुवै टोली प्लेअफमा दोस्रो पटक आमनेसामने हुँदैछन्।

यसअघि यी दुई टोली २०२३ को क्वालिफायर–२ मा भिडेका थिए। उक्त खेलमा गुजरातले मुम्बईलाई ६२ रनले पराजित गरेको थियो। आइपिएलमा मुम्बई र गुजरात अहिलेसम्म ६ पल्ट आमुन्नेसामुन्ने भएका छन्।। जसमध्ये गुजरातले ५ खेल जितेको छ। मुम्बईले भने २ खेल मात्र जितेको छ।

दुवै टोली यस सिजनमा तेस्रो पटक आमनेसामने हुन लागेका हुन्। यसअघि दुई खेल खेल्दा गुजरातले दुवै पटक जितेको थियो। दुवै टोली पहिलो पटक महाराजा यादविन्द्र सिंह अन्तर्राष्ट्रिय रंगशालामा भिड्नेछन्।

मुम्बईले पाँचौं पटक इलिमिनेटर खेल्न लागेको हो। यसअघि सन् २०११, २०१२, २०१४ र २०२३ मा मुम्बईले इलिमिनेटर खेलेको थियो। यी सबै सिजनमा टोली फाइनलसम्म पनि पुग्न सकेन, उपाधि जित्ने त परको कुरा। २०११ र २०२३ मा इलिमिनेटर जितेको इलिमिनेटर क्वालिफायर–२ मा हारेको थियो। सन् २०१२ र २०१४ मा इलिमिनेटरबाटै बाहिरिएको थियो। गुजरातले भने पहिलोपल्ट इलिमिनेटर खेल्न लागेको हो।

मुम्बईको शीर्ष अर्डर उत्कृष्ट लयमा छ। पूर्व कप्तान रोहित शर्माले ३ अर्धशतक र १४७.५३ को स्ट्राइक रेटसहित ३२९ रन बनाएका छन्। मुम्बईका सर्वाधिक स्कोरर सूर्याकुमार यादव यस सिजनमा उत्कृष्ट ब्याटिङ गरिरहेका छन्। उनले १६७.९७ को स्ट्राइक रेटमा ६४० रन बनाएका छन्।

बायाँ हाते तीव्र गतिका बलर ट्रेन्ट बोल्टले मुम्बईबाट सबैभन्दा धेरै विकेट लिएका छन्। उनले १४ खेलमा १९ विकेट लिएका छन्। जसप्रीत बुमराहले अहिलेसम्म १० खेलमा १७ विकेट लिएका छन्।

यस सिजनमा गुजरातका ओपनरहरू पनि उत्कृष्ट लयमा छन्। बायाँ हाते ब्याटर साई सुदर्शन सिजन र टोलीको सर्वाधिक रनकर्ता हुन्। उनले अहिलेसम्म १५५.३७ को स्ट्राइक रेटमा ६७९ रन बनाएका छन्। उनले यस सिजनमा ५ अर्धशतक बनाएका छन्। कप्तान शुभमन गिलले अहिलेसम्म ६ अर्धशतकसहित ६४९ रन बनाएका छन्। उनको स्ट्राइक रेट १५६.३८ छ। गिल सिजनको दोस्रो सर्वाधिक रनकर्ता हुन्।

तीव्र गतिका बलर प्रसिद्ध कृष्ण सिजनमा दोस्रो सर्वाधिक विकेट लिने बलर हुन्। उनले अहिलेसम्म १४ खेलमा २३ विकेट लिएका छन्। यस अवधिमा उनको इकोनोमी रेट ७.९० रहेको छ। प्रसिद्ध सर्वाधिक विकेट लिने बलर चेन्नई सुपर किंग्सका नूर अहमदभन्दा एक विकेट पछाडि छन्। टोलीमा मोहम्मद सिराज र इशान्त शर्माजस्ता अनुभवी बलरहरू पनि छन्।