पथरी, मोरङ। मोरङको पथरीशनिश्चरे–१० स्थित जिरिखिम्ती मैदानमा जारी प्रथम कञ्चनजंघा क्रिकेट प्रतियोगिता अन्तर्गत बुधबार भएका दुई खेलमा डाँस मोरङी र आयोजक कञ्चनजंघा क्रिकेट क्लब सेमिफाइनलमा प्रवेश गरेका छन्।
काँकडभिट्टाको बी एन्ड एस क्रिकेट क्लबलाई २ विकेटले हराउँदै डाँस मोरङीले सेमिफाइनलमा स्थान बनायो।
टस हारेर पहिला ब्याटिङ गरेको काँकडभिट्टाले १७.१ ओभरमा सबै विकेट गुमाउँदै ९० रनको सामान्य लक्ष्य प्रस्तुत गर्यो। कालू यादवले २६ तथा आसिक राना मगरले ११ रन बनाएका थिए। अन्य ब्याट्सम्यानले उल्लेखनीय प्रदर्शन गर्न सकेनन्।
डाँस मोरङीका प्रदीप मण्डलले उत्कृष्ट प्रदर्शन गर्दै ४ विकेट लिए। रोहित राजवंशी र उमर शानीले समान २/२ विकेट तथा आरके मण्डल र सुवास रोयले समान १/१ विकेट लिए।
९१ रनको लक्ष्य पछ्याउँदै डाँस मोरङीले १५.४ ओभरमा ८ विकेट गुमाएर लक्ष्य पूरा गर्यो। रोहित मण्डलले २४ रन र रोहित राजवंशीले १७ रन बनाए। काँकडभिट्टाका कालू यादवले ३ विकेट, शिव राजवंशी र प्रवेश कामतीले समान २/२ विकेट लिए। म्यान अफ द म्याच प्रदीप मण्डल घोषित भए।
झापाको ढुकुरपानी क्रिकेट क्लबलाई ५ विकेटले पराजित गर्दै आयोजक कञ्चनजंघा क्रिकेट क्लब सेमिफाइनलमा प्रवेश गर्यो। उमेर समुहका राष्ट्रीय खेलाडी दीपेश कडेल , कोशी प्रदेशका कप्तान फिर्दोस अन्सारीसहित अधिकाश खेलाडी लिएर मैदानमा उत्रिएको ढुकुरपानी पराजित बन्दै घर फर्कियो ।।
टस जितेर ब्याटिङ रोजेको ढुकुरपानीले २० ओभरमा ९ विकेट गुमाएर १४६ रन बनायो। सन्तोष कार्कीले ४१, श्रवण यादवले ३८ र दीपेश कडेलले १८ रन जोडे।
आयोजकतर्फ नितेश साहनीले ३ विकेट लिए भने नूरी निशार र अभि लिम्बूले २/२ विकेट तथा ज्ञानेन्द्र श्रेष्ठ र सुरज न्यौपानेले १/१ विकेट लिए।
१४७ रनको लक्ष्य आयोजकले १८ ओभरमै ५ विकेटको क्षतिमा पूरा गर्यो। सुरज न्यौपानेले ४६, सोनु मण्डलले ४०, अभि लिम्बूले ३२ तथा नूरी निशारले १५ रनको योगदान दिए।
ढुकुरपानीका प्रशान्त यादवले ३ विकेट तथा फिर्दोस अन्सारी र श्रवण यादवले १/१ विकेट लिए। म्यान अफ द म्याच नूरी निशार घोषित भए।
