मेसीले डल्लाससँग खेलेनन्

काठमाडौं। लिओनल मेसी आइतबार हुने इन्टर मियामी र एफसी डल्लासबीचको लिग घरेलु खेलमा अनुपस्थित भएकाछन्।

अर्जेन्टिनी स्टार विंगरको नाम खेल सुरु हुनु अघि क्लबले सार्वजनिक गरेको टोलीमा न त सुरुआती टोलीमा थियो, न त ब्याकअप टोलीमा।

इन्टर मियामीले बिहीबार कन्काकाफ च्याम्पियन्स कपको सेमिफाइनल चरणको पहिलो लेगमा भ्यानकुभरसँग पराजय बेहोरेको थियो। मेसीले उक्त खेलमा पुरै ९० मिनेट खेलेका थिए, जसमा मियामी २-० ले पराजित भएको थियो।

बुधबार हुने दोस्रो लेगको तयारीका लागि मेसी आइतबार खेल्ने सम्भावना पहिले नै कम देखिएको थियो। उनी शनिबारको अभ्यास सत्रमा पनि सहभागी भएका थिएनन्।

इन्टर मियामीका प्रशिक्षक हाभिएर मास्चेरानोलाई अभ्यास पछि सञ्चारकर्मीहरूले सोध्दा उनले आइतबार टोलीमा परिवर्तन हुने बताएका थिए।

आठ पटक बालोन डि’ओर विजेता मेसीले सन् २०२३ को जुलाईमा इन्टर मियामीमा प्रवेश गरेका हुन्। उनले यस सिजन लिगका ६ खेलमा तीन गोल र दुई असिस्ट गरेका छन्।

आइतबारको खेलअघि मियामी पाँच जित र ३ बराबरीसहित पूर्वी कन्फ्रेन्समा पाँचौं स्थानमा १८ अंकसहित रहेको छ।

मेसीका  टोलीका सहकर्मीहरू लुइस सुआरेज र जोर्डी आल्बा पनि आइतबारको खेलमा सहभागी हुने छैनन् भने सर्जियो बुस्केट्स रिजर्भ टोलीमा रहेका छन्।