काठमाडौं। कोपा डेल रे फाइनलको अन्तिमतिर रियल मड्रिडका डिफेन्डर एन्टोनियो रुडिगरले रेफ्रीतर्फ बरफ फ्याँक्ने प्रयास गरेका थिए।
शनिबार बार्सिलोनासँग ३–२ को हार बेहोरेको खेलमा त्यति मात्रै होइन उनी आक्रामक रुपमा कराएका पनि थिए। यो कार्यसँगै उनी बहु खेलको प्रतिबन्ध पर्न सक्ने जोखिममा परेका छन्।
रेफ्री रिकार्डो डे बर्गोस बेन्गोचेआले खेलको अन्त्यतिर विरोध जनाएका कारण रियल का जुड बेलिङ्घम र लुकास भास्क्वेजलाई पनि रातो कार्ड देखाएका थिए।
डे बर्गोसले आफ्नो म्याच रिपोर्टमा रुडिगरले प्रशिक्षक क्षेत्रबाट कुनै वस्तु फ्याँकेका थिए जुन मलाई नछोइकन गयो भनी उल्लेख गरेका छन्। साथै उनले रुडिगरको आक्रामक व्यबहार रहेको बताएका छन्।
रुडिगर पहिल्यै मैदानबाट बाहिरिसकेका थिए। उनलाई रियलका खेलाडी र स्टाफले समातेर रोक्नुपरेको थियो। उनले सानो बरफको झोला हातमा लिएर रेफ्रीप्रति कराउन जारी राखेका थिए।
फाइनल अघि नै डे बर्गोसले रियलको आधिकारिक टिभी च्यानलले आफूविरुद्ध बदनाम गर्ने अभियान चलाएको भन्दै गुनासो गरेका थिए।
-1746105523.JPG)
