महमुदुल्लाहले एकदिवसीय क्रिकेटबाट लिए सन्न्यास

काठमाडौं। बंगलादेशका अलराउन्डर महमुदुल्लाहले एकदिवसीय क्रिकेटबाट सन्न्यास लिएका छन्।

३९ वर्षीय क्रिकेटरले सन् २०२१ मा टेस्ट र २०२४ मा टी–२० आईबाट सन्न्यास लिइसकेका थिए। एकदिवसीय क्रिकेटबाट पनि आफूले सन्न्यास लिएको उनले सामाजिक सञ्जालमार्फत जानकारी दिएका हुन्।

महमुदुल्लाहले एकदिवसीयमा बंगलादेशका लागि चौथो सर्वाधिक रन बनाउने खेलाडीको रूपमा आफ्नो करियर समाप्त गरे। एकदिवसीय खेलमा उनले ३६.४६ को औसतमा पाँच हजार ६८९ रन बनाएका छन्, जसमा चार शतक र ३२ अर्धशतक समावेश छन्। 

बंगलादेशका लागि एकदिवसीय खेलमा मुशफिकुर रहिम, शकिब अल हसन र तमिम इकबालले महमुदुल्लाहभन्दा बढी रन बनाएका छन्।

मुशफिकुरले एकदिवसीयबाट सन्न्यास लिएको एक हप्तापछि महमुदुल्लाहले उनको पदचाप पछ्याएका हुन्। बंगलादेश च्याम्पियन्स ट्रफीबाट बाहिरिनुको मुख्य दोष यी दुई खेलाडीमाथि लगाइएको थियो। 

महमुदुल्लाहका चारै शतक आइसिसीका प्रतियोगितामा बनेका हुन्। तीमध्ये तीन एकदिवसीय विश्वकपमा र एक शतक सन् २०१७ च्याम्पियन्स ट्रफी बनेका हुन्।

यो कुनै पनि बंगलादेशी ब्याट्सम्यानले बनाएको आइसिसी प्रतियोगितामा सबैभन्दा धेरै शतक पनि हो। महमुदुल्लाहले सन् २००७ मा बंगलादेशका लागि डेब्यू गरेका थिए र मुख्यतया बलर थिए। यद्यपि, उनको करियरको टर्निङ प्वाइन्ट सन् २०११ को विश्वकपबाट भएको हो।

इङ्ग्ल्यान्डमाथि दुई विकेटको जितमा शफिकुल इस्लामसँग नवौं विकेटका लागि ५८ रन जोडे। सन् २०१५ को विश्वकपमा तेस्रो नम्बरमा ब्याटिङ गर्दै उनलेइङ्ग्ल्यान्ड र न्युजिल्यान्डविरुद्ध लगातार दुई शतक बनाए। उनले च्याम्पियन्स ट्रफीमा न्युजिल्यान्डविरुद्ध शतक बनाए र शकिब अल हसनसँग २२३ रनको साझेदारी गरे।

२०२३ को एकदिवसीय विश्वकप अघि महमुदुल्लाहलाई टोलीबाट बाहिर राखिएको थियो। तर, दक्षिण अफ्रिकाविरुद्ध टोलीको हारमा शतक बनाएर विश्वकपमा फर्किएका थिए। उनले सन् २०२४ मा पनि बंगलादेशका लागि नियमित अर्धशतक प्रहार गरे।

अफ स्पिनरको रूपमा महमुदुल्लाहको नाममा ८२ विकेट छन्। महमुदुल्लाहले कहिल्यै एकदिवसीयमा बंगलादेशको नेतृत्व गरेनन् तर उनले टेस्ट र टी–२० मा बंगलादेशको नेतृत्व गर्ने अवसर पाए।

महमुदुल्लाहको सन्न्याससँगै २००६ देखि बंगलादेशका लागि खेलेका सफल क्रिकेटरहरूको युगको अन्त्य पनि भएको छ। यस वर्ष मुशफिकुर र तमिमले अन्तर्राष्ट्रिय क्रिकेटबाट सन्न्यासको घोषणा गरे। शकिबले गत वर्ष टेस्ट र टी–२० क्रिकेटबाट सन्न्यासको घोषणा गर्दै च्याम्पियन्स ट्रफी आफ्नो अन्तिम प्रतियोगिता हुने बताएका थिए। 

विभिन्न कारणले च्याम्पियन्स ट्रफी गुमाएपछि उनको अन्तर्राष्ट्रिय क्रिकेट पनि सकिएको छ भने मशरफे मोर्तजाले कप्तानी त्यागेपछि सन् २०२० मा बंगलादेशका लागि अन्तिम पटक एकदिवसीय खेलेका थिए।