सान्त्वना जितसँगै शृंखला अन्त्य गर्ने लक्ष्यमा नेपाल

काठमाडौं। घरेलु टोली नेपालले त्रिकोणात्मक महिला अन्तर्राष्ट्रिय टी–२० क्रिकेट शृंखलाको अन्तिम खेलमा शुक्रबार थाइल्यान्डको सामना गर्दैछ।

कीर्तिपुरस्थित त्रिवि क्रिकेट मैदानमा हुने खेल अपराह्न १२:१५ बजे सुरु हुनेछ। थाइल्यान्डसँगको तेस्रो भेटमा नेपाल सान्त्वना जितसँगै शृंखला अन्त्य गर्ने लक्ष्यमा हुनेछ। नेपाल शृंखलाका पाँचै खेलमा जितविहीन छ।

पाहुना टोली थाइल्यान्डसँगका अघिल्ला दुई भेटमा नेपाल चार विकेट र पाँच रनले पराजित भएको थियो। नेदरल्यान्ड्ससँग २० रन, १५ रन र १० विकेटको हार बेहोरेको थियो। 

थाइल्यान्ड भने नेपाललाई पराजित गर्दै उपाधि हत्याउने लक्ष्यमा हुनेछ।  थाइल्यान्डले नेपालबाहेक नेदरल्यान्ड्सलाई आठ विकेट र १७ रनले हराएको थियो। एक खेलमा भने थाइल्यान्डले एक विकेटको पराजय बेहोरेको थियो।