काठमाडौं। चर्को हुटिङ र समर्थनले भरिएको सान्तोसको भिल्ला बेल्मिरो स्टेडियम। माहोल त उसै रोमाञ्चक हुने भई नै हाल्यो। समर्थकहरू आफ्ना प्रिय खेलाडी नेयमारलाई पुन: मैदानमा देख्न आतुर थिए। यस दिनको प्रतिक्षा उनीहरूले १२ वर्षदेखि गरेका हुन्।
नेयमारको आगमनले केवल सान्तोसका समर्थकलाई मात्र होइन, ब्राजिलियन फुटबल प्रेमीहरूलाई पनि उत्साहित बनाएको थियो। बोटाफोगोविरुद्धको उक्त खेलमा नेयमार दोस्रो हाफमा मैदानमा उत्रिए। उनको आगमनसँगै स्टेडियममा ऊर्जा थपियो।
एसिएलको सर्जरीबाट निको भई फर्किएका उनले आफूलाई सावित गर्न खेल सुरु गरे। उनले बक्सको छेउबाट एक पछि अर्को बलियो प्रहार गरे। समर्थकहरू हरेक प्रहारमा चिच्याउँदै उनलाई हौसला दिइरहेका थिए।
यो खेल केवल नेयमारको पुनरागमन मात्र थिएन। यो त उनको लागि आलोचकहरूको मुख बन्द गराउने अवसर पनि थियो। खासगरी अल–हिलालका पूर्वप्रशिक्षक जर्ज जिसस, जसले नेयमारको खेल्न सक्ने क्षमतामा प्रश्न उठाएका थिए। ‘मैदान नै मेरो एकमात्र स्थान हो, जहाँ म आलोचनाको सामना गर्न सक्छु,’ नेयमारले खेलपछि भने।
नेयमारलाई वैकल्पिक खेलाडीका रूपमा मैदानमा उतारिएको थियो। तर, बोटाफोगोका खेलाडीले उनको प्रत्येक चालमा निगरानी राखे। उनलाई पाँच पटक फाउल गरियो। तर, उनले आफ्नो ध्यान फुटबलमै केन्द्रित राखे। उनले ६ पटक गोल गर्ने प्रयास गरे र २२ पास दिए, जसले मैदानमा उनको उपस्थिति प्रभावशाली बनायो।
तर, यो रात नेयमारको लागि विजयी बन्न सकेन। बोटाफोगोले पुनरागमन गर्दै सान्तोससँग १–१ को बराबरीमा रोक्यो। खेलपछि जब अन्तिम सिठ्ठी बज्यो, विपक्षी खेलाडीहरू उनीसँग तस्बिर खिच्न दौडिए।
उनको अनुहारमा हल्का मुस्कान थियो। ‘मैले यहाँबाट २१ वर्षको उमेरमा यात्रा सुरु गरें, विश्व घुमें, खेल्ने क्लबहरूमा इतिहास बनाएँ। यो सम्मान मलाई घर फर्किँदा पाएको उपहार हो,’ उनले भने।
उनले सान्तोसका लागि आफ्नो पहिलो स्पेलमा २२५ खेल खेलेर १३८ गोल गरेका थिए। यस पटक उनी पेलेको १० नम्बरको जर्सी लगाएर मैदानमा उत्रिएका हुन्।
खेलपछि भने, ‘मलाई अझ धेरै समय र खेलहरू आवश्यक छ। म अहिले १०० प्रतिशत दिन सक्ने अवस्थामा छैन। तर, मैले यति धेरै दौडिएला भन्ने सोचेको पनि थिइनँ।’
नेयमारको पुनरागमनले मात्र होइन, मैदानमा देखिएको उनको आत्मविश्वासले समर्थकहरूलाई नयाँ आशा दिएको छ। मैदानको प्रदर्शनले आलोचकहरूलाई जवाफ दिन खोजेका उनले आगामी अझ तीन–चार खेलपछि आफ्नो प्रतिभा अझै निखार्ने विश्वास दिलाएका छन्।
-1742480470.webp)
