काठमाडौं। ब्राजिली फरवार्ड नेयमारले १२ वर्षपछि आफ्नो बाल्यकालीन क्लब सान्तोसमा प्रतीक्षित पुनरागमन गरेका छन्। बुधबार ब्राजिलियन पाउलिस्ता च्याम्पियनसिपमा भएको बोटाफोगोविरुद्धको खेलमा उनी मैदान उत्रिएका हुन्। उक्त खेल १–१ को बराबरीमा टुंगियो।
उर्बानो काल्देइरा स्टेडियममा हजारौं समर्थकहरूले मोबाइलको प्रकाश बाल्दै उनलाई स्वागत गरेका थिए। ३३औं जन्मदिन मनाउँदै गरेका नेयमार पहिलो हाफमा बेञ्चमै बसे र टिकिन्हो सोआरेसको पेनाल्टी गोलबाट सान्तोसले अग्रता लिएको अवस्थामा दोस्रो हाफमा मैदान प्रवेश गरे।
तर, १६ महिनापछि भएको पहिलो खेलमा नेयमार दबाबमा देखिए। उनले बार्सिलोनामा पाँच वर्षसम्म आफूलाई विश्वका उत्कृष्ट खेलाडी बनाएका थिए। तर, सोही स्तरको खेल पुनः देखाउने प्रयास गरे पनि त्यो पर्याप्त भएन।
६७औं मिनेटमा एलेक्जान्ड्रे डे जीससले बोटाफोगोका लागि बराबरी गोल गरे। त्यसको चार मिनेटपछि वालिसनले नेयमारमाथि फउल गर्दा रातो कार्ड पाए। तर, संख्यात्मक अग्रता लिएको सान्तोसले त्यसलाई अवसरमा बदल्न सकेन।
खेलपछि नेयमारले भावुक हुँदै भने, ‘जब तपाईले कुनै चीजलाई माया गर्नुहुन्छ, त्यो भावनालाई व्यक्त गर्न शब्द पाउनु हुँदैन। म सान्तोसलाई धेरै माया गर्छु र आज यो मैदानमा पाइला टेक्दा महसुस भएको भावनालाई वर्णन गर्न सक्दिनँ।’
नेयमारले खेल कठिन भएको बताउँदै थपे, ‘म मेरो बुबासँग कुरा गरिरहेको थिएँ। मैले भने, यो गाह्रो खेल हो। उनीहरू कडा मार्किङ गर्दैछन्। बोटाफोगो डिफेन्समा बलियो टोली हो। उनीहरूले एउटा अवसर पाए र गोल गरे। मलाई अहिले धैर्य राखेर अभ्यास गर्न आवश्यक छ।’
नेयमारले गत अक्टोबरमा उरुग्वेविरुद्धको विश्वकप छनोट खेलमा बाँया घुँडाको एसिएलमा चोट बोकेका थिए। त्यसयता साउदी अरबको क्लब अल–हिलालमा सीमित सात खेल मात्र खेले। उनको सान्तोस फर्कने सम्झौताले करियरलाई पूर्ण चक्रमा ल्याएको छ। नेयमारले भने, ‘म फेरि त्यो गर्नेछु, जसलाई म धेरै माया गर्छु। अर्थात फुटबल खेल्ने।’
-1746755007.webp)
