काठमाडौं। पेरिस सेन्ट जर्मेन (पिएसजी) ले अन्ततः केलियन एमबाप्पेको अनुपस्थितिमा पनि च्याम्पियन्स लिगमा चम्किन सक्ने क्षमता देखाएको छ।
बुधबार राति म्यानचेस्टर सिटीविरुद्ध दोस्रो हाफमा २–० ले पछि परेको अवस्थामा पुनरागमन गर्दै ४–२ को महत्त्वपूर्ण जित निकाल्दै पिएसजीले आफ्नो सम्भावना बलियो बनाएको हो।
यो जितसँगै पिएसजी नयाँ स्वरूपको च्याम्पियन्स लिगको तालिकामा उकालो लाग्दै नकआउट चरणनजिक पुगेको छ भने सिटी संकटमा परेको छ। पिएसजीलाई अब अर्को साता स्टुटगार्टसँग बराबरी गरे मात्र पनि अगाडि बढ्न पर्याप्त हुनेछ।
‘आजको प्रदर्शनले मलाई गर्व महसुस भएको छ। यस्तो टोली र प्रशिक्षकविरुद्ध खेल्दा हाम्रो प्रदर्शन उत्कृष्ट रह्यो,’ पिएसजीका प्रशिक्षक लुइस एनरिकेले भने, ‘यो एक उत्कृष्ट प्रदर्शन थियो।’
पिएसजीको पुनः डिजाइन गरिएको आक्रमणले यसपटक एमबाप्पेको निर्भरता हटाउँदै चार फरक खेलाडीले गोल गरे। २२ वर्षीय ब्राडली बार्कोलाले एक गोल गर्दै फ्रेन्च खेलाडी उस्माने डेम्बेलेलाई अर्को गोलका लागि सहयोग गरे। २० वर्षीय मिडफिल्डर जोआओ नेभ्सले तेस्रो गोल हेडमार्फत गरे भने स्ट्राइकर गोनसालो रामोसले इन्जुरी समयमा चौथो गोल थपे।
‘टिममा जति प्रतिस्पर्धा धेरै हुन्छ, म त्यति नै खुसी हुन्छु। कुनै पनि खेलाडीले आफ्नो स्थान सुरक्षित ठान्न सक्दैन भन्ने यसले प्रमाणित गर्छ,’ एनरिकेले थपे। एमबाप्पे, नेयमार र लिओनल मेस्सीजस्ता स्टारहरूले भरिएको पिएसजीले विगतमा च्याम्पियन्स लिगको ठूलो मञ्चमा सफलताको खोजी गर्दा पटकपटक असफल हात पारेको थियो।
एम्बाप्पेले यसै सिजन रियल जाने निर्णय गरेपछि पिएसजीले च्याम्पियन्स लिगमा गोलको अभाव महसुस गर्दै आएको थियो। टोलीले सिटीको भ्रमणअघि ६ खेलमा मात्र ६ गोल गरेको थियो। तर, बुधबारको जितले टोलीको सामूहिक प्रयासले नतिजामा फरक पर्न सक्ने प्रमाणित गर्यो।
सिटीका प्रशिक्षक पेप गार्डिओलाले टोलीको प्रदर्शनलाई आलोचना नगरी पिएसजीको जितलाई श्रेय दिए। ‘हामीले यो स्वीकार गर्नुपर्छ। ट्रान्जिसनमा हामी उनीहरूको गतिसँग सामना गर्न सकेनौं,’ उनले भने, ‘पिएसजीले उत्कृष्ट प्रदर्शन गर्यो। टोलीका सबै खेलाडीले राम्रो खेले। यो कुनै एक खेलाडीको मात्र कुरा होइन।’
सिटी ५३औं मिनेटसम्म २–० ले अगाडि थियो। तर, बार्कोलाको प्रेरणादायी प्रदर्शनले पिएसजीलाई खेलमा फर्कायो। उनले साभिन्होलाई बिट गर्दै डेम्बेलेलाई उत्कृष्ट पास दिए, जसबाट गोल भयो। त्यसपछि बार्कोलाले नै डोउको प्रहार क्रसबारबाट फर्किएपछि रिबाउन्डमा गोल गरे।
नेभ्सले ७८औं मिनेटमा फ्रि किकलाई हेडरमार्फत गोल गर्दै पिएसजीलाई अग्रता दिलाए। रामोसले स्टपेज टाइममा गोल थप्दै टोलीको जित सुनिश्चित गरे।
पिएसजीका अध्यक्ष नासेर अल–खेलाइफीले टोलीको प्रदर्शनको प्रशंसा गर्दै एनरिकेलाई विश्वकै उत्कृष्ट प्रशिक्षक माने। ‘हामी युवा टोली हौं, तर यो टोलीमा चरित्र छ। धेरैले हाम्रो टोलीलाई शंका गरेका थिए, तर मैले सधैं विश्वास राखेको थिएँ,’ उनले भने। एमबाप्पेको बिदाइले टोलीलाई कमजोर बनाएको मानिए पनि यो जितले वास्तविकता फरक रहेको देखाएको छ।
