नेपाललाई अर्को झड्का, ज्ञानेन्द्र आउट भए

काठमाडौं । घरेलु टोली संयुक्त अरब इमिरेट्स (युएई) संगको दोस्रो एकदिवसीय क्रिकेटमा नेपालले अहिले ब्याटिङ गरिरहेको छ ।

दुबईस्थित आईसीसी क्रिकेट एकेडेमीमा टस जितेर पहिले ब्याटिङ गरिरहेको नेपालले दोस्रो विकेट गुमाएको छ । नेपालले दोस्रो विकेटको रुपमा ओपनर ज्ञानेन्द्र मल्ललाई ४४ रनमा गुमाएको छ । ज्ञानेन्द्रलाई जाहोर खानले आउट गरे ।

यसअघि नेपालले पहिलो विकेटको रुपमा बिनोद भण्डारीलाई २१ रनमा गुमाएको थियो । ज्ञानेन्द्र र विनोदले पहिलो विकेटका लागि ६१ रनको साझेदारी गरेका थिए । यो एकदिवसीय अन्तराष्ट्रिय क्रिकेटमा नेपालको सर्वाधिक ठुलो स्कोरको साझेदारी हो । यसअघि नेदरल्यान्ड्सविरुद्ध ज्ञानेन्द्र र अनिल कुमार साहले ५८ रनको साझेदारी गरेका थिए ।

ज्ञानेन्द्र आउट भएपछि कप्तान पारस खड्का र दिपेन्द्र सिंह ऐरी क्रिजमा रहेका छन् । नेपालले १९ ओभर सकिदा २ विकेट गुमाएर ७४ रन जोडेको छ ।

पहिलो खेलमा पराजित नेपाल आजको खेल जित्दै सिरिज १-१ गर्न चाहन्छ । पहिलो एकदिवसीय सिरिज जित्ने लक्ष्यमा रहेको नेपाललाई युएईसंगको दोस्रो खेल निकै महत्वपूर्ण रहेको छ ।

अन्तराष्ट्रिय क्रिकेट परिषद (आईसीसी) बाट एकदिवसीय मान्यता पाएपछि दोस्रो एकदिवसीय सिरिज खेलीरहेको नेपाललाई सिरिज जोगाउन जित्नै पर्ने दबाब छ ।