जैब र विनोदको शतकीय साझेदारीमा जनकपुरलाई विशाल लक्ष्य

काठमाडौं। ओपनरद्वय सैफ जैब र विनोद भण्डारीको शतकीय साझेदारीसँगै सुदूरपश्चिम रोल्यसले नेपाल प्रिमियर लिग (एनपिएल) को फाइनलमा जनकपुर बोल्ट्सलाई १८५ रनको विशाल लक्ष्य दिएको छ।

कीर्तिपुरस्थित त्रिवि क्रिकेट मैदानमा सुदूरपश्चिमका कप्तान दीपेन्द्रसिंहले टस जितेर पहिला ब्याटिङ गर्ने निर्णय लिएका थिए। यो निर्णय सुदूरपश्चिमका लागि फलदायी रह्यो। सुदूरपश्चिमले निर्धारित २० ओभरमा आठ विकेट गुमाउँदै १८४ रन बनायो।

पहिलो पावरप्लेमा कुनै विकेट नै नगुमाई  सुदूरपश्चिम ४८ रन बनाउन सफल भएको थियो। जनकपुरले दुई मेडन आफैंसँग राख्दा पनि सुदूरपश्चिमलाई रोक्न सकेन। अझ जैबले आक्रामक ब्याटिङ देखाउँदै ३३ बलमै अर्धशतक पूरा गरे। 

एनपिएलमा यो उनको दोस्रो अर्धशतक हो। यसअघि लिग चरणमा उनले लुम्बिनी लायन्सविरुद्ध ९० रन बनाएका थिए। १२औं ओभरको अन्तिम बलमा ललितनारायण राजवंशीबाट क्याच ६९ रनमा क्याच हुनुअघि उनले दुईपल्ट जीवनदान पाए। उनले ४३ बलमा आठ चौका र दुई छक्का प्रहार गरे।

पहिलो विकेटका लागि उनले विनोद भण्डारीसँग ११७ रनको साझेदारी गरे। एक समय सुदूरपश्चिमले २०० रन बनाउने संकेत देखाएको थियो। तर, उनी आउट भएसँगै सुदूरपश्चिमले तीन ओभरमा तीन विकेट गुमायो। ३१ बलमा एक चौका र तीन छक्कासहित ४१ रन बनाएका विनोदलाई ललितले बोल्ड गरे। ब्रान्डन म्याकमुलन र हर्मित सिंह समान १४ रनमा पभिलियन फर्किए।

त्यसपछि क्रिजमा आएका कप्तान दीपेन्द्रसिंह ऐरी नौ, आरिफ शेख एक र नरेश बूढाऐर आठ रनमा क्याच आउट भए।

जनकपुरका मोहम्मद मोहसिन र किशोरम महतोले समान तीन विकेट लिए। जिमी निसम र ललितनारायण राजवंशीको नाममा समान एक विकेट रह्यो।