कार्लो बने क्लब इतिहासकै सबैभन्दा धेरै उपाधि जित्ने प्रशिक्षक

काठमाडौं। रियल मड्रिडले मेक्सिकन टोली पाचुकालाई ३–० ले पराजित गर्दै इन्टरकन्टिनेन्टल कपको उपाधि जितेको छ। यो जितले कार्लो एन्सेलोट्टीलाई क्लब इतिहासकै सबैभन्दा धेरै उपाधि जित्ने प्रशिक्षक बनाएको छ। उनले मिगुएल मुनोजको १४ ट्रफीको कीर्तिमानलाई तोड्दै आफ्नो १५औं उपाधि उचाले।

एन्सेलोट्टी, जसलाई हालै फिफा ‘द बेस्ट’ अवार्डअन्तर्गत वर्षको उत्कृष्ट पुरुष प्रशिक्षक घोषित गरिएको थियो। खेलपछि आफ्नो खुसी व्यक्त गर्दै भने, ‘हामीले उत्कृष्ट प्रदर्शन गऱ्यौं। यो सफलता टोलीको उत्कृष्ट मनोवृत्ति र प्रतिबद्धताको परिणाम हो।’

खेलमा केलियन एमबाप्पे, रोड्रिगो र भिनिसियस जुनियरले एक–एक गोल गरे। रियल यो जितसँगै चार पटक इन्टरकन्टिनेन्टल कप जित्ने इतिहासकै पहिलो क्लब बनेको छ। यसअघि सन् १९६०, १९९८, र २००२ मा क्लबले यो प्रतियोगिता जितेको थियो।

एमबाप्पेले चोटपछि मैदानमा फर्कँदै ३७औं मिनेटमा भिनिसियसको पासलाई गोलमा परिणत गरेर रियललाई अग्रता दिलाए। ५३औं मिनेटमा रोड्रिगोले कर्नरबाट आएको बलमा अर्को गोल थपे। खेलको अन्त्यतिर भिनिसियसले पेनाल्टीबाट गोल गर्दै जितलाई सुनिश्चित गरे।

पाचुकाले यस प्रतियोगिताको प्रारम्भिक चरणमा दक्षिण अमेरिकी च्याम्पियन बोटाफोगो र इजिप्टका अल अहलीलाई पराजित गर्दै फाइनलसम्मको यात्रा तय गरेको थियो। तर, उपाधि जित्ने पाचुकाको सपना रियलको बलियो प्रदर्शनका कारण अधूरो रह्यो।

फिफाले सन् २०२५ मा क्लब विश्वकपलाई ३२ टोलीमा विस्तार गर्ने घोषणापछि यो इन्टरकन्टिनेन्टल कप नयाँ ढाँचामा हुन लागेको अन्तिम संस्करण हो। रियलले पाँच पटक क्लब विश्वकप जितेको इतिहास पनि बोकेको छ।

सन् २०२१ मा पुनः रियलको प्रशिक्षक बनेका एन्सेलोट्टीले आफ्नो दोस्रो कार्यकालमा ११ वटा उपाधि जितेका छन्, जसमा एक च्याम्पियन्स लिग पनि समावेश छ। क्लबमा ६५ वर्षीय प्रशिक्षकको यो सफलता उनको उत्कृष्ट व्यवस्थापन र रणनीतिक कौशललाई पुष्टि गर्छ।