कोशी बाहिरिएसँगै बागमतीले सुपर लिग खेल्ने

काठमाडौं। राष्ट्रिय महिला लिगको दोस्रो चरण (सुपर लिग) को पहिलो खेलमा विभागीय टोली त्रिभुवन आर्मी क्लबले बागमती युवा क्लबसँग खेल्ने भएको छ।

अखिल नेपाल फुटबल संघ (एन्फा) ले सोमबार पहिलो चरणको लिगमा सानदार प्रदर्शन गर्दै सुपर लिगमा स्थान बनाएको कोशी प्रदेशलाई बाहिर राख्दै खेल तालिका सार्वजनिक गरेको हो। आर्मीले पहिलो चरणमा २२ अंकसहित दोस्रो स्थान हात पारेको थियो। यो खेल पुस १८ गते सातदोबाटोस्थित एन्फा कम्प्लेक्सको मैदानमा अपरान्ह्र तीन बजे हुनेछ।

गत भाद्र र असोजमा एन्फा कम्प्लेक्सको मैदानमा राउन्ड रोबिनको आधारमा सञ्चालित पहिलो चरणमा विभागीय तीन टिमसहित १० टिमले प्रतिस्पर्धा गरेका थिए। जसमा सशस्त्र प्रहरी बल एपिएफ (२५ अंक) पहिलो, आर्मी (२२) दोस्रो,  नेपाल पुलिस क्लब (२१) तेस्रो, वालिङ नगपालिका (१५) चौथो र कोशी प्रदेश (१४) पाँचौं स्थानमा रहेका थिए। बागमती (१०) छैटौं, संकटा फुटबल क्लब (आठ) सातौं, चन्द्रपुर नगरपालिका (आठ) आठौं, कर्णाली प्रदेश (चार) नवौं र सबै खेल हारेको सुदूरपश्चिम अन्तिम तथा १०औं स्थानमा रहेका थिए।

एन्फाका अनुसार शीर्ष पाँच टोलीले सुपर लिग खेल्न पाउने थिए। तर, आर्थिक संकट जनाउँदै कोशी प्रदेश फुटबल संघको टिमले नखेल्ने भएपछि एन्फाले बागमतीलाई स्थान दिएको हो। सुपर लिगमा सहभागी पाँच टिमले एक–अर्काविरुद्ध दुई–दुई खेल खेल्नेछन्।

त्यसबाट एक टोली बाहिरिइने छ भने शीर्ष चार टोली प्लेअफ पुग्नेछन्। शीर्ष दुई टोली पहिलो क्वालिफायरमा पुग्ने छन्। तेस्रो र चौथो स्थान हासिल गर्ने टोली इलिमिनेटरमा प्रतिस्पर्धा गर्ने एन्फाले जनाएको छ। पहिलो क्वालिफायर विजेताले सिधै फाइनलमा स्थान बनाउने छ। पराजित टोलीले इलिमिनेटरको विजेतासँग दोस्रो क्वालिफायरमा प्रतिस्पर्धा गर्नेछ ।

दोस्रो क्वालिफायर विजेताले उपाधिका लागि पहिलो क्वालिफायर विजेताको सामना गर्नेछ । प्लेअफदेखिका सम्पूर्ण खेल त्रिपुरेश्वरस्थित दशरथ रंगशालामा हुने एन्फाले जनाएको छ।