काठमाडौं। स्कट कुग्गेलिजनको सानदार बलिङसँगै पोखरा एभेन्जर्सलाई पराजित गरेको सुदूरपश्चिम रोयल्सले नेपाल प्रिमियर लिग (एनपिएल) मा क्वालिफायर खेल्ने सम्भावना बलियो बनाएको छ। आइतबार भएको खेलमा सुदूरले पोखरालाई पाँच रनले हराएको हो।
सुदूरले दिएको १५४ रनको लक्ष्य पछ्याएको पोखराले १९.४ ओभरमा विकेट गुमाउँदै १४८ रन मात्रै बनाउन सक्यो। जितसँगै सुदूर ६ खेलबाट १० अंक बटुल्दै शीर्ष स्थानमा उक्लिएको छ। सुदूरले लिगचरणको अन्तिम खेल सोमबार कर्णाली याक्ससँग खेल्ने छ। पोखराले भने सात खेलबाट ६ अंकसहित प्रतियोगिता सक्काएको छ। जनकपुर बोल्ड्स १० अंकसहित दोस्रो स्थानमा रहँदा चितवन राइनोज, कर्णाली र काठमाडौं गुर्खाजको समान आठ अंक छ।
अंक तालिकाका शीर्ष दुई टोलीले सिधै क्वालिफायर १ खेल्ने छन्। बाँकी दुई टोलीले भने एलिमिनेटर खेल्ने छन्। चितवनले इलिमिनेटर खेल्ने पक्का भएको छ।
सुदूरलाई जित दिलाउन स्कट कुग्गेलिजनले सर्वाधिक पाँच विकेट लिए। ३.४ ओभर बलिङ गरेका उनले एक मेडन लिँदै १८ रन खर्चिए। हर्मित सिंहले तीन र सैफ जैबले एक विकेट आफ्नो खातामा लेखाए।
पोखराले खराब सुरुआत गरेको थियो। पहिलो पावर प्लेमै ओपनर दिनेश खरेल, कप्तान कुशल भुर्तेल र दिलिप नाथलाई पोखराले गुमाएको थियो। दिनेश १५, कुशल शून्य र दिलिप एक रनमा आउट भएपछि पोखरा दबाबमा परेको थियो। पावर प्ले सकिएको अर्को ओभरमा सानदार ब्याटिङ गरिरहेका ओपनर आन्द्रेस गौउस पनि ३६ रनमा सैफ जैबको बलमा आरिफ शेखबाट क्याच आउट भए।
२१ बल खेलेका उनले चार चौका र दुई छक्का प्रहार गरे। त्यसपछि जेन मलिक १० रनमा आउट हुँदा पोखरा १०.१ मा ५-६९ को स्थितिमा थियो। तर, रेइफर र किरण ठगुन्नाले छैटौं विकेटका लागि ७० रनको विशाल साझेदारी गर्दै पोखरालाई खेलमा फर्काउने प्रयास गरे। यद्यपि, रेफइर १८.१ ओभरमा हर्मित सिंहको बललाई छक्का प्रहार गर्ने धुनमा नरेन साउदबाट बाउन्ड्री लाइन नजिकबाट क्याच आउट भए। २८ बल खेलेका उनले समान दुई चौका र छक्कासहित ३३ रनको योगदान दिए।
त्यसपछि आएका माइकल लिस्क पाँच र किरण ठगुन्ना पनि ३२ रनमा पभिलियन फर्किएपछि सुदूरले खेलमा पुनरागमन गर्यो। सुदीप अर्याल र विपिन खत्री शून्य रनमा आउट भए।
त्यसअघि कीर्तिपुरस्थित त्रिवि क्रिकेट मैदानमा टस हारेर पहिला ब्याटिङ गरेको सुदूरपश्चिमले निर्धारित २० ओभरमा सात विकेट गुमाउँदै १५३ रन बनाएको हो। सुदूरले पनि सुरुआत राम्रो गर्न सकेन।
ओपनर सैफ जैबलाई रेमन रेइफरले नौ रनमै बोल्ड गरे। अर्का ओपनर विनोद भण्डारी पनि क्रिजमा लामो समय टिक्न सकेनन्। १६ बलमा एक चौका र छक्कासहित १४ रन बनाए। त्यसपछि पनि सुदूरको विकेट झर्नेक्रम जारी रह्यो। ब्रान्डन म्याकमुलन २३, हर्मित सिंह १३ रनमा आउट भए। तर, पाँचौं विकेटका लागि कप्तान दीपेन्द्रसिंह ऐरी र आरिफ शेखले ४१ रनको साझेदारी गर्दै सुदूरलाई १४.६ ओभरमा ५–१११ को स्थितिमा पुर्याए।
१६ बलमा दीपेन्द्रले एक चौकासहित २० रन बनाए। ईशान पाण्डे १० रनमा रिटायर्ड आउट हुँदा आरिफ ४२ र नरेश बूढाऐर ६ रनमा अविजित रहे। आरिफले ३८ बलमा दुई चौका र एक छक्का प्रहार गरे।
पोखराका कप्तान कुशल भुर्तेलले सर्वाधिक दुई विकेट लिए। चार ओभर बलिङ गरेका उनले २७ रन खर्चिए। रेमन, सागर ढकाल र माइकल लिस्कले समान एक विकेट लिए।
