काठमाडौंले जित्नै पर्ने खेलमा विराटनगरले राख्यो गप्टिल र प्रतिशलाई बेन्चमा

काठमाडौं। एक खेलअगाबै नेपाल प्रिमियर लिग (एनपिएल)बाट बाहिरिइसकेको विराटनगर किङ्सले काठमाडौं गुर्खाजविरुद्ध मुख्य खेलाडीलाई आराम दिएको छ।

कीर्तिपुरस्थित त्रिवि क्रिकेट मैदानमा जित्नै पर्ने खेलमा काठमाडौंका कप्तान करण केसीले टस जितेका छन्। योसँगै उनले विराटनगरलाई पहिला ब्याटिङको निम्तो दिएका छन्।

विराटनगरले ओपनर मार्टिन गप्टिललाई आराम दिएको छ। गप्टिल विराटनगरका सर्वाधिक रनकर्ताको सूचीमा दोस्रो स्थानमा रहेका ब्याटर हुन्। ६ इनिङ्स खेलेका उनले एक अर्धशतकसहित १३७ रन बनाएका छन्। उनलाई समस्या रहेको टिमले जनाएको छ।

यस्तै, अलराउन्डर प्रतिश जिसीलाई पनि विराटनगरले बाहिर राखेको छ। प्रतिशले पाँच इनिङ्समा ब्याटिङबाट २० रन बनाएका छन्। यस्तै, बलिङबाट उनले नौ विकेट लिएका छन्। इस्मात आलम र अनिल खरेलले स्थान बनाएका छन्।

काठमाडौंले पनि विराटनगरविरुद्धको खेलमा दुई परिवर्तन गरेको छ। राजु रिजाल र नाथन सोटरलाई आराम दिएको छ।