टोरेसको दुई गोलसँगै बार्सिलोनाको रोमाञ्चक जित

काठमाडौं। फेरान टोरेसको दुई गोलसँगै बार्सिलोनाले च्याम्पियन्स लिगमा बुधबार बोरुसिया डर्टमन्डलाई पराजित गरेको छ। 

सिंगल इडुना पार्कमा घरेलु टोली बोरुसिया डर्टमन्डविरुद्ध ३-२ बार्सिलोनाले रोमाञ्चक जित निकालेको हो। जितसँगै ६ खेलमा १५ अंक जोडेको बार्सिलोना दोस्रो स्थानमा उक्लिएको छ। पराजित डर्टमन्ड समान खेलबाट १२ अंकका साथ १०औं स्थानमा छ।

५२औं मिनेटमा राफिन्हाको गोलमार्फत बार्सिलोनाले सुरुआती अग्रता लिएको थियो। त्यसको आठ मिनेटपछि नै सेरहाउ गुइरासीले डर्टमन्डका लागि बराबरी गोल फर्काए।

७५औं मिनेटमा टोरेसले गोल गर्दा बार्सिलोना पुन: २-१ को अग्रता दिलाए। त्यसको तीन मिनेटपछि नै गुइरासीले व्यक्तिगत दोस्रो गोल गर्दै डर्टमन्डलाई २-२ को बराबरीमा ल्याए।

निर्धारित समय सकिन पाँच मिनेट बाँकी रहँदा टोरेसले व्यक्तिगत दोस्रो गोल गर्दै बार्सिलोनालाई जित दिलाए।