नन्दनको कसिलो बलिङसँगै कर्णालीको लगातार दोस्रो जित

काठमाडौं। नन्दन यावदको कसिलो बलिङसँगै कर्णाली याक्सले नेपाल प्रिमियर लिग (एनपिएल) मा लगातार दोस्रो जित निकालेको छ। शनिबार भएको खेलमा कर्णालीले विराटनगर किङ्सलाई सात रनले हराएको हो। 

कर्णाली सुरुआती दुई खेलमा जनकपुर रोयल्ससँग आठ र काठमाडौं गुर्खाजसँग तीन विकेटले पराजित भएको थियो। तर, चितवन राइनोजविरुद्ध अन्तिम बलमा ६ विकेटको जित निकाल्दै कर्णालीले प्रतियोगितामा पुनरागमन गरेको थियो। जितसँगै चौथो स्थानमा उक्लिएको कर्णालीको चार अंक पुगेको छ। समान खेलबाट दुई अंक जोडेको विराटनगर सातौं स्थानमा छ।

विराटनगरलाई अन्तिम ओभरमा जितका लागि १४ रन चाहिएको थियो। तर, नन्दनले कप्तान सन्दीप लामिछाने र प्रतिश जिसीलाई मात्र सात रन दिए। योसँगै १३४ रनको लक्ष्य पछ्याएको विराटनगरले निर्धारित २० ओभरमा आठ विकेट गुमाउँदै १२६ रन मात्रै बनाउन सक्यो।

सन्दीप ६ र प्रतिश सात रनमा अविजित रहे। विराटनगरका निकोलस किर्टनले सर्वाधिक ४० रन बनाए। ३९ बल खेलेका उनले चार चौका र एक छक्का प्रहार गरे। लोकेश बम १९ र दीपक बोहरा १८ रनमा आउट हुँदा अन्यको प्रदर्शन राम्रो हुन सकेन।

कर्णालीका नन्दनले सर्वाधिक तीन विकेट लिए। चार ओभर बलिङ गरेका उनले मात्रै १९ रन खर्चिए। विपिन शर्माले दुई विकेट लिँदा सोमपाल कामी, विलियम बोसिस्टो र युनिस ठकुरीको नाममा समान एक विकेट रह्यो।

त्यसअघि कीर्तिपुरस्थित त्रिवि क्रिकेट मैदानमा टस हारेर पहिला ब्याटिङ थालेको कर्णालीले निर्धारित २० ओभरमा सबै विकेट गुमाउँदै १३३ रन बनायो।

कर्णालीका ओपनर देव खनाल र विलियमले तेस्रो विकेटका लागि १०२ रनको शतकीय साझेदारी गरेका थिए। त्यसबाहेक ठूलो साझेदारी हुन नसक्दा कर्णाली न्युन स्कोरमा खुम्चिएको हो।

कर्णालीका विलियमले सर्वाधिक ६६ रन बनाए। ४९ बल खेलेका उनले पाँच चौका र तीन छक्का प्रहार गरे। देव ५३ रनमा आउट हुँदा अन्यले दोहोरो अंकमा रन बटुल्न सकेनन्। गुल्शनकुमार झासहित चार खेलाडीले खाता खोल्न सकेनन्।

कर्णालीलाई सस्तैमा रोक्न २० वर्षीय प्रतिश जिसीले उत्कृष्ट बलिङ गरे। चार ओभर बलिङ गरेका उनले एक मेडनसहित १७ रन खर्चिएर सर्वाधिक चार विकेट लिए। क्रिस सोल र बसिर अहमदले समान दुई विकेट लिँदा अकिब इलियासको नाममा एक विकेट रह्यो।