टस जितेर पहिला ब्याटिङ रोजेकोमा सोमपाललाई छैन पछुतो

काठमाडौं। नेपाल प्रिमियर लिग (एनपिएल)का अघिल्ला दुई खेलमा जसले टस जितेर बलिङको निर्णय गरे उसले जित हात पारे। तर, सोमबार भएको दोस्रो खेलमा भने कर्णाली याक्सका कप्तान सोमपाल कामीले यो तथ्य थाहा हुँदाहुँदै टस जितेर पहिला ब्याटिङ गर्न तम्सिए।

यो नै खेलमा सबैभन्दा ठूलो भुल भयो। निर्धारित २० ओभरमा सात विकेट गुमाउँदै १४२ रनको कीर्तिमानी लक्ष्य दिए पनि जनकपुरले १५.१ ओभरमा दुई विकेट गुमाउँदै सहज जित निकाल्यो। तर, सोमपाल पहिला ब्याटिङ गर्ने आफ्नो निर्णयमा पछुतो नरहेको बताउँछन्।

‘मैले जे डिसिजन लिएको छु लाइफमा मलाई त्यसले रिग्रेट गराएको छैन। हाम्रो टोलीको ब्याटिङ र बलिङ दुवै राम्रो छ। त्यसैले राम्रै लक्ष्य दिने सोचेको थिएँ तर त्यो भएन। यद्यपि, आफ्नो निर्णयमा कुनै पछुतो छैन,’ उनले भने।

कीर्तिपुरस्थित त्रिवि क्रिकेट मैदानमा टस हारेर पहिला ब्याटिङ थालेको कर्णालीले तल्लो क्रमका अर्जुन घर्ती र कप्तान सोमपाल कामीको अर्धशतकीय साझेदारीमा १४१ रन बनाएको थियो। तर, सुरुमा सोमपालको टस जितेर ब्याटिङ गर्ने निर्णय कर्णालीलाई महँगो सावित भयो। चर्को शुल्क तिरेर ल्याएको भारतीय पूर्वब्याटर शिखर धवन चल्न सकेनन्। ओपनर देव खनाल एक रनमै पभिलियन फर्किए। लगालग विकेट गुमाइरहेको अवस्थामा अर्जुन र सोमपालले अर्धशतकीय साझेदारी गरेपछि कर्णालीले निर्धारित २० ओभरमा सात विकेट गुमाउँदै १४१ रन बनाएको हो।  

२२ बल खेलेका अर्जुन दुई चौका र दुई छक्कासित ३३ रन बनाएर आउट भए। सोमपाल १३ बलमा तीन चौका र एक छक्कासहित २९ रन बनाएर अविजित रहे। उनीहरूबीच सातौं विकेटका लागि ५६ रनको विशाल साझेदारी भएको थियो। अर्जुनले १९औं ओभरमा हर्ष ठाकरलाई दुई छक्का र दुई चौका प्रहार गरेका थिए। उक्त ओभरमा उनले ६ बलमै २२ रन जोडे। अर्को ओभरमा सोमपालले निसमको सुरुआती तीन बलमा १४ रन प्रहार गरेपछि कर्णाली मजबुत बनेको थियो। अर्जुन रन आउट भए।

‘राम्रो टार्गेट सेट गरेपछि अर्को टोलीलाई गाह्रो हुन्छ। त्यसैले खेलमा १७० रनभन्दा बढी जोड्ने लक्ष्यसहित हामीले ब्याटिङ रोजेका हौं। तर, ३० रन कम भयो,’ उनले सुनाए। सुरूमै आफूले सबैलाई जिम्मेवारी दिएको उनको भनाइ छ। तर, उक्त जिम्मेवारी पूरा गर्न नसकेकोमा उनी खिन्न देखिए।

राम्रो साझेदारी गरेर अघि बढ्ने योजना सफल भएन। तर, ब्याटिङमा समस्या देखियो। यद्यपि, प्रतियोगिता लामो छ अरू खेलमा राम्रो खेल्ने प्रदर्शन गरेर पुनरागमन गर्छौं,’ उनले भने।