काठमाडौं । नेपाल ओलम्पिक कमिटि एनओसीले आफु आबद्ध खेल संघलाई सदस्यता नदिएको भन्दै ६ वटा राष्ट्रिय खेलकुद संघले आईतबार पत्रकार सम्मेलनको आयोजना गरेका छन् । दुई तिहाई संघले एक तिहाई संघलाई ओलम्पिक भन्दा बाहिर राखेर ‘ईन्जोए’ गरिरहेको भन्दै उनीहरुले ओलम्पिक नेतृत्वको आलोचना गरेका हुन् । अन्तराष्ट्रिय महासंघ र अन्तराष्ट्रिय ओलम्पिक कमिटिको म्यानडेटका बाबजुत एनओसीले आफुलाई नियतवस ओलम्पिक बाहिर राखेको ६ खेल संघको आरोप छ ।
ओलम्पिक विधान संशोधनका लागि एनओसीले आगामी मंगलबार साधारण सभा बैठक बोलाएको छ । बैठकको दुई दिन अघि पहिलो पटक पत्रकार सम्मेलन गरेर ओलम्पिक खेलका ६ खेल संघ आफुहरुलाई सदस्यताको मान्यता दिन दबाब दिएका हुन् ।
सदस्यता दिने भन्दा अझ कडा ब्यवस्था गरेर आफुहरुलाई ओलम्पिक बाहिर राख्न खोजेपछि ओलम्पिक नेतृत्वप्रति ६ खेल संघ असन्तुष्ट र आक्रोशित छन् । नेपाल ओलम्पिकको मनपरीविरुद्ध ६ वटा खेल संघ सदस्यताको माग गर्दै अदालतमा मुद्धा समेत दायर गरेका छन्, जसको फैसला आउन बाँकी छ ।
नेपाल क्लाईम्बिङ संघका अध्यक्ष रमेश पौडेलले सदस्यता नदिएर नेपाल ओलम्पिक कमिटिले आफुहरुलाई अपमान गरेको बताए । ‘कहिले सदस्यता दिने हो, त्यो भन्दिन पर्यो । हैन भने के कमजोरी हो, त्यो औल्याईदिन पर्यो ।’ उनले भने, ‘सदस्यताको नाममा एनओसीले सधै अस्विकार र अपमान मात्र गरेको छ ।’
एमालेको भातृ संगठन नेपाल खेलकुद महासंघका पूर्व अध्यक्ष समेत रहेका पौडेलले साधारण सभाबाट हुन गैरहेको विधान संशोधनलाई रोक्न समेत आग्रह गरेका छन् । उनले एनओसीको विधान संशोधनले नेपाली खेलकुदलाई राम्रो नगर्ने बताए । ‘ओलम्पिकको ब्यवहारले अंगिकृत नागरिकतावालाले जन्मसिद्धलाई अपमान गरे जस्तो महशुस भैरहेको छ ।’ उनले भने ।
नेपाल घोडचढी संघका अध्यक्ष रविराज कर्णिकारले नियतवस ओलम्पिकले आफुहरुलाई झुलाएर राखेको बताए । ‘नेतृत्ले दिन्न पनि नभन्ने, दिन पनि नदिने भएको छ ।’ उनले भने ।
ओलम्पिकले गर्न लागेको विधान संशोधनप्रति समेत टिप्पणी गर्दै उनले भने, ‘एनओसीले गर्न लागेको विधान संशोधन ओलम्पिक चार्टर र गुड गभर्नेन्स विपरित छ । यो संशोधनलाई अन्तराष्ट्रिय ओलम्पिक कमिटिले मान्दैन ।’
नेपाल बेसबल संघका अध्यक्ष दीपक न्यौपानेले सदस्यता दिने समयमा नेपाल ओलम्पिकले प्रकृयालाई अझ जटिल बनाउन खोजेको आरोप लगाए । उनले ओलम्पिकमा सहभागी हुने खेल सिधै ओलम्पिक खेल संघ हुने अन्तराष्ट्रिय मान्यतालाई नेपालमा गलत तरिकाले बाहिर राख्न खोजिएको बताए ।
नेपाल रग्वी संघका अध्यक्ष दीपक देवकोटाले कुनैपनि हालतमा नेपाल ओलम्पिकले आफुहरुलाई सदस्यता दिनुपर्ने धारणा राखे । ‘सहज तरिकाले दिनुहुन्छ कि भोलि बाध्य भएर दिनुहुन्छ, उहाँहरुको विवेकको कुरा हो । तर एक दिन दिनै पर्छ । सधै नेतृत्वमा मै हुन्छु भन्ने भ्रम ओलम्पिक नेतृत्वले नराखे हुन्छ ।’ उनले थपे ।
