काठमाडौं । नेपाल ओलम्पिक कमिटि एनओसीको विधान संशोधनको छिनोफानो अब साधारण सभाबाट टुङ्गो लाग्ने भएको छ । अन्तराष्ट्रिय ओलम्पिक कमिटिले विधान संशोधन साधारण सभाबाट गराउन सुझाव दिएसँगै नेपाल ओलम्पिकको शक्ति संघर्षको वारपार साधारण सभाबाट लाग्ने भएको हो ।
वर्तमान अध्यक्ष जीवनराम श्रेष्ठ विधान संशोधन गरेर आजिवन ओलम्पिकको नेतृत्वमा बस्ने रहर गरेपछि ओलम्पिकभित्र विधान संशोधनको नयाँ लफडा सुरु भएको छ । विधान स्वीकृतिका लागि एनओसीले अन्तराष्ट्रिय ओलम्पिक कमिटि आईओसीमा पठाएको थियो । तर आईओसीले चुनावको मुखमा विधान संशोधन गर्ने विषय ठिक नहुने भन्दै साधारण सभाबाट आउन भनेको छ । ‘चुनावको मुखमा विधान संशोधन गर्न ठिक हुदैन भन्ने आईओसीको टिप्पणी छ । अब साधारण सभाले बाँकी विषयको निर्णय गर्छ ।’ एनओसी महासचिव निलेन्द्रराज श्रेष्ठले खेलपाटीसँग भने ।
विधान संशोधनको निर्णय गर्न एनओसीले मंसिर १८ गते साधारण सभा बैठक बोलाएको छ । विधान स्वीकृत हुन सभाले दुई तिहाई सहित संशोधन स्वीकृत गर्नुपर्ने हुन्छ । एनओसीमा २७ वटा संघ आबद्ध छन्, दुई तिहाईका लागि १८ मत आवश्यक पर्छ ।
वर्तमान अध्यक्ष जीवनरामले बहुमतका आधारमा एनओसीको बोर्ड बैठकबाट विधान पारित गराएका थिए । विधान संशोधनमा दुई सदस्यले नोट अफ डिसेन्ट लेखेका थिए । पछिल्लो समय १९ जना कार्यसमितिका सदस्यलाई सोही पदमा राखेर नेतृत्वमा तेहरिने दाउमा जीवनराम छन् । त्यसका लागि जीवनरामले दुई तिहाई सहित विधान संशोधन गर्नुपर्ने चुनौती छ ।
विधान संशोधन गरेर तेहरिने जीवनरामको कार्यशैलीप्रति असन्तुष्टि जनाउँदै महासचिव निलेन्द्र राज श्रेष्ठले अध्यक्षमा उम्मेदवारी दिने घोषणा गरिसकेका छन् । वर्तमान कार्यसमितिमा उपाध्यक्ष रहेका शुनिलकुमार श्रेष्ठले आजीवन अध्यक्ष बन्न खोज्ने वर्तमान नेतृत्वको विरोध गर्दै भावी अध्यक्षका लागि गृहकार्य गरिरहेका छन् । अघिल्लो चुनावमा जीवनरामलाई चुनौती दिएको कार्यसमिति बाहिरका संघका पदाधिकारीहरुको साथ शुनिललाई छ । पछिल्लो बोर्ड बैठकमा विधान संशोधनविरुद्ध नोट अफ डिसेन्ट लेख्न शुनिललाई ओलम्पिक कार्यसमितिका सदस्य दीर्घबहादुर केसी (कुमार)ले साथ दिएका थिए ।
