प्रतिशको सानदार बलिङ, नेपालसँग अस्ट्रेलिया पराजित

काठमाडौं। प्रतिश जिसीको सानदार बलिङसँगै नेपालले हङकङ सिक्स क्रिकेट प्रतियोगितामा लगातार दोस्रो जित निकालेको छ। 

शनिबार बिहान भएको खेलमा नेपालले अस्ट्रेलियालाई ११ रनले पराजित गरेको हो। नेपालको यो लगातार दोस्रो जित हो। पोल ‘बी’ मा रहेको नेपालले यसअघि इङ्ल्यान्डलाई ६ विकेटले पराजित गर्दै एक खेलअगावै क्वार्टरफाइनलमा स्थान बनाइसकेको थियो।

नेपाल आफ्नो पोलको शीर्ष स्थानमा रह्यो। शतप्रतिशत जितसहित नेपालले चार अंक जोड्यो। इङ्ल्यान्डलाई पहिलो खेलमा ३४ रनले हराएको अस्ट्रेलियाले पनि क्वार्टरफाइनलमा स्थान बनाइसकेको छ। नेपालले शनिबार नै सेमिफाइनल प्रवेशका लागि श्रीलंकालाई चुनौती पेस गर्नेछ। खेल दिउँसो १:३५ बजे हुनेछ।

नेपालले दिएको ११२ रनको लक्ष्य पछ्याएको अस्ट्रेलियाले निर्धारित ६ ओभरमा पाँच विकेट गुमाउँदै १०० रन मात्रै बनाउन सक्यो। 

अस्ट्रेलियाका ज्याक उडले अविजित रहँदै सर्वाधिक ५५ रन बनाए। १६ बल खेलेका उनले चार चौका र ६ छक्का प्रहार गरे। यस्तै, एलेक्स रोसले १४ रनको योगदान दिए। अन्य ब्याटरले भने उत्कृष्ट प्रदर्शन गर्न सकेनन्।

नेपालका प्रतिशले दुई ओभरमा २४ रन खर्चिएर सर्वाधिक तीन विकेट लिए। लोकेश बम र विवेक यादवको नाममा समान एक विकेट रह्यो।

त्यसअघि मिसन रोड ग्राउन्ड हङकङमा टस हारेर पहिला ब्याटिङ थालेको नेपालले निर्धारित ६ ओभरमा दुई विकेट गुमाउँददै १११ रन बनाएको थियो।

नेपालका कप्तान सन्दीप जोराले अर्धशतक बनाए। १६ बल खेलेका उनले पाँच चौका र चार छक्का प्रहार गरे। जारी प्रतियोगिता उनको यो दोस्रो अर्धशतक हो। यसअघि उनले इङ्ल्यान्डविरुद्ध पनि अर्धशतक प्रहार गरेका थिए। दुवैपल्ट उनी अविजित रहँदै रिटायर्ड हर्ट भए।

यस्तै, लोकेशले १३ बलमा तीन चौका र तीन छक्कासहित ३३ रन बनाए। विवेक १२ रनमा आउट हुँदा राशिद खान १२ रनमा अविजित रहे। उनले दुई बलमा दुई छक्का प्रहार गर्दै नेपालको स्कोर १११ रनमा पुर्‍याएका हुन्।

नेपालको दुवै विकेट ज्याकले लिएका थिए। उनले अलराउन्ड प्रदर्शन गरेपनि आफ्नो टोलीलाई जित दिलाउन सकेनन्।