पहिरोमा पुरिएका एन्फा एकेडेमीका विकलको निजगढमा अन्त्येष्टि  

निजगढ। मकवानपुरको इन्द्रसरोवर गाउँपालिका–३ सिस्नेरी टेकरमा पहिरोमा परी मृत्यु भएका निजगढका खेलाडी विकल रेग्मीको सोमबार अन्त्येष्टि गरिएको छ।

उनी श्री बत्सलादेवी नेपाल फुटबल संघ (एन्फा) एकेडेमीमा प्रशिक्षणरत थिए। उनीसहित ६ जनाको शनिबार पहिरोमा पुरिएर मृत्यु भएको थियो।

विकलको सोमबार निजगढको लालबकैया नदी किनारस्थित आर्यघाटमा अन्त्येष्टि गरिएको हो। अन्त्येष्टिअघि विकलको शवलाई नगर परिक्रमा गराइएको थियो। नगर परिक्रमा पश्चात् शवलाई निजगढ ९ स्थित चाइनिज क्याम्प मैदानमा श्रद्धाञ्जली सभाको लागि राखिएको थियो। निजगढ फुटबल क्लबको संयोजनमा निजगढ नगरपालिकाले श्रद्धाञ्जली सभाको आयोजना गरेको हो। निजगढ नगरपालिकाले आयोजना गरेको उक्त श्रद्धाञ्जली सभामा विकलको शवमा प्रतिनिधिसभा सदस्य ज्वाला शाह, पूर्वयुवा तथा खेलकुदमन्त्री पुरुषोत्तम पौडेल, मधेस प्रदेशसभा सदस्य मिनाकुमारी लामा, निजगढ नगरपालिकाका प्रमुख सुरथ पुरी,उपप्रमुख सोममाया थिङलगायत स्थानीय जनप्रतिनिधिहरूले फूलमालासहित श्रद्धाञ्जली अर्पण गरेका थिए।

विकलको पार्थिव शरीरमा मधेस प्रदेश फुटबल संघका कोषाध्यक्ष शम्भु सिंह ठकुरी र बारा जिल्ला फुटबल संघका वरिष्ठ उपाध्यक्ष राजकिशोर धामीले एन्फाको झन्डा ओढाएका थिए।  पहिरोमा विकलसहित मकवानपुरका साइमन योन्जन, अनुप घलान, दिवस बानियाँ, सर्लाहीका आदित्य बलम्पाकी र काठमाडौंका रियान्स आचार्यको निधन भएको थियो। 

एकेडेमीको लागि एन्फाले छनोट गरेको सम्पूर्ण चरणहरू पार गर्दै विकल अध्ययन सँगसँगै प्रशिक्षणरत थिए। विकलसँगै निजगढका अन्य ४ जना खेलाडीहरू पनि सोही एकेडेमीमा प्रशिक्षणरत थिए। एकेडेमीमा ४० जना खेलाडीहरू प्रशिक्षणरत थिए।