शीर्ष स्थानको कोशीलाई सजिलो जित

काठमाडौं। पूर्णीमा राईको दुई गोलसँगै कोशी प्रदेशले एन्फा महिला लिगमा अपराजित यात्रालाई कायमै राखेको छ। सातदोबाटोस्थित एन्फा कम्प्लेक्समा आइतबार भएको खेलमा कोशीले कर्णाली प्रदेशलाई ४-० ले हराएको हो। 

योसँगै शीर्ष स्थानमा रहेको कोशीले तीन खेलबाट नौ अंक पुर्‍याएको छ। कर्णालीको भने एक अंक छ। कोशीका लगि पूर्णीमाबाहेक समीक्षा मगर र प्रतीक्षा राईले दुई गोल थपिन्।

पूर्णीमाको गोलमार्फत कोशीले पहिलो हाफ १-० को अग्रता लिएको थियो। तर, ६७औं मिनेटमा समीक्षाले गोल गर्दै अग्रता २-० मा पुर्‍याइन्। समीक्षाको जारी लिगमा यो चौथो गोल हो। त्यसको पाँच मिनेटपछि नै पूर्णीमाले व्यक्तिग दोस्रो र टोलीका लागि तेस्रो गोल गरिन्। 

७५औं मिनेटमा प्रतीक्षाले अर्को गोल थप्दै कोशीलाई सानदार जित दिलाइन्।